Шубҳасиз айтиш мумкинки, бугун жаҳон ҳамжамияти эътиборида янги Ўзбекистондаги ўзгариш ва қўлга киритилаётган ютуқлар кенг муҳокама қилинмоқда. Айниқса, спортчиларимизнинг дунё ареналарида эришаётган муваффақиятлари, ўзбек деган номнинг баралла тараннум этилишида катта аҳамият касб этяпти.
Албатта, бунинг замирида мамлакатимизда юртбошимиз томонидан айни йўналишга берилаётган имконият ва яратилаётган шароитларнинг алоҳида ўрни бор. Мана масалан, ташкил этилганига эндигина 3 йил бўлган, юртимиз учун янги спорт тури ҳисобланмиш француз бокси “Сават”, бугун қамров даражасини кундан – кунга ошириб, бутун республика миқёсида 2 мингга яқин ўғил-қизларни ўзининг атрофида бирлаштирди. Нисбатан қисқа вақт оралиғида унинг “Комба” ва “Ассо” йўналишлари бўйича “Ўзбекистон кубоги” ва “Ўзбекистон чемпионати” мусобақалари ўтказилди.
Бундан ташқари, янги Ўзбекистон француз бокси “Сават” ассоциацияси президенти “Туронбанк” АТБ Бошқарув Раиси Мирзаев Чори Садибакосович саъй-ҳаракатлари билан атлетларимиз Италиянинг Милан шаҳрида ўтган катталар ўртасидаги жаҳон чемпионатида илк бора қатнашиб, 2 та бронза медалини қўлга киритишди.
Шунингдек, Бангладеш мамлакатининг Дакка шаҳри мезбонлик қилган 3-Осиё чемпионати ҳам Ўзбекистон миллий терма жамоаси учун омадли келиб, спортчиларимиз “Ассо” ва “Комба” йўналишларида 3 та олтин, 3 та бронза медалига эга қилишди.
Қолаверса, вакилларимиз Болгариянинг Пловдив шаҳрида ташкил этилган халқаро чемпионатда ҳам муваффақиятли иштирок этиб, 7 та олтин, 5 та кумуш ва 2 та бронза медалига муносиб кўрилишди.
Яна бир эсда қоларли ва ассоциация учун керакли натижани олиб келган ютуқ Сербия давлатида ўтган ёшлар иштирокидаги “Жаҳон чемпионати” ва кадетлар ўртасидаги “Жаҳон кубоги” мусобақалари бўлди. Унда ҳамюртларимиз 2 та олтин ва 2 та бронза медалига эга бўлишди.
