Данияда муддатидан олдин парламент сайловлари бўлиб ўтяпти

Данияда муддатидан олдин парламент сайловлари бошланди. 1 ноябрь сешанба куни 4,3 миллионга яқин сайловчи 179 нафар халқ депутатини сайлайди. Сайлов участкалари соат 20.00 (Тошкент вақти билан 24.00)гача очиқ бўлади, сайлов натижаларининг дастлабки прогнозлари улар ёпилгандан сўнг дарҳол кутилмоқда. Дастлабки натижалар сайловдан кейин тунда эълон қилиниши режалаштирилган.

Бир палатали парламентдаги ўринлар учун 14 партиядан номзодлар кураш олиб боради. Фолкетингда ўринларни қўлга киритиш учун уларни сайловчиларнинг камида 2 фоизи қўллаб-қувватлаши керак.

Данияда сайловолди ташвиқоти биринчи навбатда ички масалаларга, хусусан, юқори инфляция ва энергия нархининг кескин ошиши атрофидаги вазиятга қарши курашга қаратилган эди. Овоз бериш натижаси жуда ноаниқ деб ҳисобланяпти.

Социал-демократ Метте Фредериксен 2019 йил июнь ойида бўлиб ўтган сайловлардан сўнг фақат ўз партиясидан ташкил топган озчилик ҳукуматини бошқарган, унда унинг партияси энг кўп овоз тўплаганди. Баъзи муаммоларни, хусусан, қатъий миграция сиёсатини ҳал қилишда у, бошқа нарсалар қатори, ўнг қанот консерватив блокининг овозларига таянди.

Бу сайловда 44 ёшли Фредериксен анъанавий сиёсий блоклардан устун бўлган ҳукуматни мақсад қилган. Украинадаги уруш, энергетика инқирози ва бошқа глобал муаммоларни ҳисобга олган ҳолда, у кенг сиёсий доирадаги партиялар билан ҳамкорлик қилиш зарур деб ҳисоблайди. Олти партиядан иборат ва либерал-консерватив Венстре партияси етакчиси Якоб Эллеманн-Енсен бошчилигидаги ўнг марказчилар блоки бундай иттифоқда иштирок этишдан бош тортмоқда.