«Энергоатом»: Запорижжя АЭС ўққа тутилгандан кейин тўлиқ қувватсизланган

Запорижжя АЭС тўлиқ ўчириш режимига ўтказилгандан сўнг ёқилган дизель генераторлари 15 кун давомида унинг ишлашини таъминлай олади, деб хабар берди «Энергоатом».

Фото: Reuters

РФ Қуролли Кучлари томонидан тунги ўққа тутилганидан кейин Запорижжя атом электр станцияси тўлиқ қувватсизланди. 3 ноябрь, пайшанба куни эрталаб Украинанинг «Энергоатом» компанияси томонидан маълум қилинишича, ўққа тутилиши ЗАЭСнинг Украина энергетика тизими билан сўнгги иккита юқори вольтли алоқа линиясига зарар етказган: «Соат 23:04 да станция тўлиқ ўчиришга ўтди. Барча 20 та дизель генераторлари ёқилган».

«Энергоатом» маълумотларига кўра, ҳозирда ЗАЭСда ўз эҳтиёжларини энергия билан таъминлаш схемаси оптималлаштирилди, тўққизта дизель генератори ишламоқда. Бешинчи ва олтинчи қувват блоклари совуқ ҳолатга ўтказилади.

Шу билан бирга, ЗАЭСни тўлиқ қувватсизлантириш режимида дизель генераторларининг ишлаши учун ёнилғи 15 кунга етади. «Орқага ҳисоблаш бошланди», деб огоҳлантирди «Энергоатом». Совитиш тизими тўхтатилгач, реакторларнинг ёнилғи таёқлари эрий бошлайди.

Октябрь ойи ўрталарида Украина компанияси раҳбари Петр Котин Германиянинг ZDF телеканалига берган интервьюсида станцияда ядровий авария эҳтимоли юқори эканлигини айтиб, станция электр таъминотида узоқ муддатли узилишлар бўлиши иккинчи «Фукусима»га олиб келиши мумкинлигини тахмин қилганди.

#Запорижжя АЭС #Энергоатом