«Хавотирланманг, биз Эронни озод қиламиз», — деди Калифорниядаги чиқиши чоғида АҚШ президенти Жо Байден ва дарҳол қўшимча қилди: «Улар тез орада ўзларини озод этишади».
АҚШ президенти Жо Байден Конгресс учун оралиқ сайловлар муносабати билан Калифорнияда қилган чиқишида АҚШ «Эронни озод қилмоқчилиги» ҳақида гапирди. Бу ҳақда Bloomberg хабар бермоқда.
Байденнинг нутқи Ироқ ва Афғонистонда хизмат қилган америкалик фахрийларга тиббий ёрдам кўрсатиш масаласига бағишланганди. Шу вақтда у пауза олди ва деди: «Хавотирланманг, биз Эронни озод этмоқчимиз».
Шундан сўнг у тезда қўшимча қилган: «Улар тез орада ўзларини ўзлари озод этишади». АҚШ президенти айнан нимани назарда тутганига аниқлик киритмаган.
Америка раҳбарининг шу иқтибоси Reuters агентлиги томонидан ҳам келтирилган, хабарда президент чиқиш қилган жойга Эрондаги намойишларни қўллаб-қувватловчи баннерлар кўтарган ўнлаб кишилар келгани айтилган.
Кўп ўтмай Эрон президенти Иброҳим Раисий Байденнинг сўзларига муносабат билдириб, Эрон 1979 йилги ислом инқилобидан кейин озод этилгани ҳақида айтиб чиқди.
«Мен [АҚШ президенти Жо] Байденга айтаманки, Эрон 43 йил муқаддам озод этилган», — дея унинг телемурожаат вақтидаги сўзларини келтиради Reuters.
Эрондаги намойишлар
Эрондаги намойишлар сентябр ойи ўрталарида, 22 ёшли қиз Маҳси Аминийнинг вафотидан кейин бошланганди. Маънавият полицияси уни Теҳрондаги метродан укаси билан чиқиш вақтида ҳижобни тўғри киймагани учун қўлга олганди.
Кейинроқ Аминийнинг укаси IranWire нашрига полициячилар у билан «қайта тарбиялаш» машғулотлари ўтказишни ваъда қилишганди. Полиция участкасидан қизни тез ёрдам машинаси орқали шифохонага олиб кетишади. Кейинроқ шифокорлар унинг юраги хуруж қилгани ва инсультга учраганини айтишади, бир неча кун ўтиб у вафот этади.
Эрон полицияси бахтсиз ҳодиса рўй берганини таъкидлаб келади. Идора Аминий ҳушини йўқотаётгани акс этган видеони намойиш этган. Аммо қизнинг қариндошлари полицияни қотиллик содир этишда гумонлаган.
Эрон ҳукумати намойишлар «душманнинг исломий режимни заифлаштиришга қаратилган стратегияси»нинг бир қисми экани ва мамлакат армияси «душманга қарши туриши», шунингдек намойишлар фонида хавфсизликни таъминлашини маълум қилган.
Эрон олий раҳнамоси оятуллоҳ Али Хоминаий намойишлар «оддий эронликлар» томонидан ўтказилмаётгани, балки олдиндан пухта режалаштирилганини айтган, шунингдек АҚШ ва Исроилни тартибсизликларни уюштиришда айблаган.
Раисий ҳам Теҳрон намойишчилар билан «қатъий курашиши»ни айтган.
Митинглар чоғида тўққиз нафар хорижлик, жумладан Германия, Польша, Италия, Франция, Нидерландия, Швеция ва бошқа мамлакатлар фуқаролари қўлга олинган. Бундан ташқари, Эронда фаолияти тақиқланган гуруҳ аъзолари бўлган 250 дан ортиқ киши террор ва тартибсизликлар қўзғатишда гумонланиб ҳибсга олинган.
