Вазир боғча мудираларини сертификат асосида ишга олиш ҳақидаги саволга жавоб берди

Шу йилдан бошлаб, мактаб директори лавозимига тайинланиш учун номзодлар махсус курсда ўқиган ва имтиҳондан ўтиб, менежерлик сертификатини олган бўлиши шарт деган талаб ўрнатилди. Kun.uz мухбири яқинда Қашқадарёнинг Миришкор туманида боғча мудирасини тайинлаш жараёни жанжалга айланиб кетганидан келиб чиқиб, бундай сертификатни боғчаларга ҳам татбиқ қилиш зарурати ҳақида мактабгача таълим вазири Агриппина Шиннинг фикри билан қизиқди.

Вазир саволга жавобан кадрларни боғча мудирлигига ўқитиш йўлга қўйилаётганини айтди, лекин сертификат масаласини тилга олмади.

“Биласиз, қонунчиликка кўра, бизда боғчалар мактабгача таълим муассасаси эмас, балки қонунан бирор маблағдан фойда олиш ҳуқуқига эга мактабгача таълим ташкилотлари ҳисобланади. Шундан келиб чиқсак, ташкилот директорлари биринчи навбатда менежер, бошқарувчи бўла олиши керак. Афсуски, бизда бошқарувчиларни тайёрлашмайди.

Биринчи маротаба бошқарувчиларни тайёрлаш мақсадида Ломоносов номидаги Москва давлат университетида [Тошкентдаги филиали назарда тутилмоқда – таҳр.] 2023 йил учун магистратура очдик. Айнан мана шу лойиҳадан олинган тажриба асосида кейинчалик ўзимизнинг миллий ОТМлар ҳам кадр тайёрлашни бошлайди. Бизга бошқарувчилар керак. Мактабгача таълим тизимидаги методикалар билан эса мактабгача таълим маълумотига эга методистлар шуғулланади”, – деди у.

Шунингдек, Агриппина Шин анжуманда журналистлар томонидан берилган саволлар кўриб чиқилишини маълум қилди. Аммо айнан сертификатлар орқали боғча директорларини тайинлаш масаласи очиқлигича қолди.