16:04 / 15.06.2023
10776

Қабул бошланишига 5 кун қолди, квоталардан эса дарак йўқ

ОТМларнинг бакалавриат босқичига қабул 20 июндан бошланиши керак. Бироқ қабулга жуда оз қолаётган бўлса-да, ҳали ҳам квоталар тасдиқланмади.

Фото: KUN.UZ

Бу йил ҳам ОТМларга қабул квоталари тасдиқланиши кеч қоляпти. Ўтган 2022 йилда ҳам, ундан олдинги йилларда ҳам квота қабул вақтига тақалиб тасдиқланади.

Жумладан, 2022 йилда – қабул квотаси 15 июнда тасдиқланган. Бунинг ортидан ҳужжат қабул қилиш жараёнлари одатий 15 июндан эмас, балки 20 июндан бошланадиган бўлди.

  • 2019 йилги қабул квотаси тўғрисидаги қарор 17 июнда чиққан.
  • 2020 йилги қабулда квота нисбатан эртароқ, 13 июнда тасдиқланган.
  • 2021 йилда квоталар 22 июнда эълон тасдиқланган ва шу кундан қабул бошланган.

Ўтган йили квота тасдиқланиши кечикканда собиқ олий ва ўрта махсус таълим вазири Абдуқодир Тошқулов ОТМларга қабул тизимидаги ўзгаришларнинг кўп бўлганини ва бу ўзгаришлар қабул квотаси билан битта қарорда тасдиқланганини сабаб қилиб кўрсатганди.

“Квота анча олдин тасдиқланган эди. Шунинг учун кейинги ўқув йилларида муаммо бўлмаслиги учун, бу қарор ва фармойишда белгиланади. Энди қарор чиқиши шарт бўлмайди. Квоталар олдинроқ чиқиши учун фармойиш билан чиқади. Ва бу қабулга алоқадор ўзгаришлар билан яхлитланмайди”, – деганди собиқ вазир.

2023 йил қабул квотаси ҳам ҳали тасдиқланмади. Лекин олий таълим, фан ва инновациялар вазири Иброҳим Абдураҳмонов квота миқдори ҳақида маълумот бериб ўтганди.

Вазирга кўра, 2023-2024 ўқув йилида 381 минг абитуриент қабул қилиниши режалаштириляпти. Шундан 60 минг квота давлат грантларига ажратилади. Лекин қачон тасдиқланиши ҳақида аниқ маълумот берилгани йўқ.

Kun.uz вазирлик матбуот хизматига квоталар қачон тасдиқланиши бўйича сўров юборди. Вазирлик сўровга жавобан квота тасдиқланган заҳоти эълон қилинишини билдирди.

Ҳали квота тасдиқланмади, лекин қабул куни аниқ: атиги 5 кун қолди. Абитуриентлар квота билан танишишига ҳам вақт керак ахир.

Зилола Ғайбуллаева, Kun.uz

Мавзу
Қабул-2023
2022/23 ўқув йили учун ихтисослашган ва президент мактаблари, коллежлар, техникумлар, бакалавриат ва магистратурага қабул ҳамда ўқишни кўчириш бўйича янгиликлар.
Барчаси
Top