Республиканинг айрим ҳудудлари иқтисодий базасини диверсификациялаш, уларнинг ихтисослашуви асосида “яшил” иқтисодиёт тамойилларидан келиб чиқиб ривожлантириш бўйича “Йўл харитаси” тасдиқланади. Бунда қуйидагиларга алоҳида эътибор қаратилади:
- ҳудудларни кластер ёндашуви асосида соҳалар бўйича ривожлантириш, инновацион ишлаб чиқариш ва хизмат кўрсатиш, фаолиятни рақамлаштиришни қўллаб-қувватловчи инфратузилма яратиш;
- ишлаб чиқариш ва хизмат кўрсатиш фаолиятида қайта тикланувчи энергия манбаларини кенг жорий қилиш, саноат корхоналарида энергия тежамкор технологияларни кенгайтириш, атмосферага чиқариладиган зарарли газлар ташланмаларини камайтиришга қаратилган модернизация лойиҳаларини рағбатлантириш;
- ишлаб чиқариш ва хизмат кўрсатиш фаолиятида қаттиқ маиший чиқиндиларни айланма (циркуляр) тамойиллар асосида қайта ишлаш ва иккиламчи хомашё сифатида ишлатишни кўзда тутувчи технология ва амалиётларни кенг жорий қилиш;
- салоҳиятли чегара ҳудудларида трансчегаравий эркин савдо зоналарини ривожлантириш.
Қуйидагиларни назарда тутувчи “Яшил кафолат” дастурлари ва табиий ресурсларга асосланган тадбиркорлик фаолиятини қўллаб-қувватлаш, молиялаштириш ва салоҳиятни ошириш имкониятларидан фойдаланишни кенгайтиришга қаратилган амалий чора-тадбирлар дастури тасдиқланади:
- тегишли соҳаларда, жумладан ўрмончилик чора-тадбирлари, ўрмонлаштириш ва у билан боғлиқ дарахтлар экиш тадбирларида “яшил” тадбиркорликни ривожлантириш;
- табиий ресурсларга асосланган тадбиркорлик фаолиятини йўлга қўйиш бўйича пилот лойиҳаларни амалга ошириш;
- “яшил” тадбиркорлик ҳамда табиий ресурсларга асосланган тадбиркорлик фаолиятларини кенгайтиришни рағбатлантириш.
Иқтисодиёт ва молия вазирлиги, Марказий банк ҳамда Камбағалликни қисқартириш ва бандлик вазирлигининг “яшил” иш ўринлари ташкил этиш ҳамда табиий ресурсларга асосланган оилавий тадбиркорлик фаолияти учун Оилавий тадбиркорликни ривожлантириш дастурлари доирасида кредитлар ажратиш таклифлари маъқулланади.
Бунда, табиий ресурсларга асосланган оилавий тадбиркорликни ривожлантириш йўналиши бўйича кредитлар ажратишда асосий эътибор доривор (ширинмия, каврак, тиканакли ковул ва бошқалар) ўсимликлар плантациялари ҳамда саноатбоп ва мевали боғларни ташкил этишга қаратилади.
Марказий банк тижорат банклари билан биргаликда 2024 йил 1 январга қадар тижорат банклари кредит сиёсатига табиий ресурсларга асосланган лойиҳаларни устувор равишда молиялаштириш ҳамда “яшил” иш ўринлари ташкил этишни назарда тутувчи ўзгартиш ва қўшимчалар киритади.
