Венецияда автобус иштирокидаги ЙТҲда 20 дан ортиқ киши ҳалок бўлди

Венецияда, Местре ва Маргер туманларини боғловчи темирйўл релслари яқинида сайёҳларни олиб кетаётган автобус йўл ўтказгичдан қулаб тушди ва ёниб кетди. Италиянинг Corriere della Sera газетаси 3 октябр, сешанба куни кечқурун хабар беришича, ушбу йўл-транспорт ҳодисасида камида 21 киши, жумладан, уч нафар бола ҳалок бўлган. 15 киши жабрланган, улардан тўрт нафари болалар, беш нафар ярадорнинг аҳволи жуда оғир.

Нашрнинг ёзишича, автобусда бошқа йўловчилардан ташқари бир гуруҳ украиналиклар ва бир неча Германия фуқаролари кетаётган бўлган. Қурбонлар орасида беш нафар Украина фуқароси, бир немис, бир хорват, бир француз ва италиялик ҳайдовчи бор. 

Фожиа содир бўлган жойга шахсан ташриф буюрган Венеция мэри Луижи Бруняро воқеа содир бўлган жойдан, ён томонида ётган автобусдан қора тутун булутлари кўтарилаётгани акс этган кадрларни «қиёмат манзараси» деб атади. ЙТҲ қурбонлари хотирасига Венецияда мотам эълон қилинди. 

Италия ҳукумати қурбонларнинг оилаларига ҳамдардлик билдирди 

Маълум қилинишича, автомашина йўлдан чиқиб, йўл ўтказгичга ўтиб кетган, сўнг панжарани бузиб, тахминан 10 метр учиб ўтган ҳамда темирйўл релслари ёнига қулаган. Автобуснинг ёниб кетиши сабаблари ҳозирча аниқланмаган. Версиялардан бирига кўра, ҳайдовчи ўзини ёмон ҳис қилган, иккинчисига кўра, автобусда ҳалокатли силжиш олдидан нимадир ёниб кетган. Бироқ, полиция томонидан сўралган гувоҳлар кейинчалик иккинчи версияни рад этди. 

Фожиа жойига ўнлаб тез ёрдам машиналари жўнатилди. Ўт ўчириш бригадасига жасадларни олиб чиқиш учун бир неча соат керак бўлди. 

Фожиа муносабати билан Венеция мэри Луижи Бруньярога Италия президенти Сержио Маттарелла ва мамлакат бош вазири Жоржа Мелони қўнғироқ қилган. «Мен ва бутун ҳукумат Местредаги жиддий йўл-транспорт ҳодисаси учун чуқур ҳамдардлик билдирамиз. Бизнинг фикримиз қурбонлар, уларнинг оила аъзолари ва яқинлари билан», - деди Мелони.