2023 йил учун танланган “йил сўзлари” сунъий интеллектга алоқадор бўлмоқда

Коллинз луғатига кўра, 2023 йил сўзи “сунъий идрок” (AI - artificial intelligence) сўзининг қисқартмаси бўлган. Луғат бу сўзга “инсоннинг ақлий қобилиятини компютер дастурлари ёрдамида моделлаштириш” деб таъриф берган.

Сунъий идрок бўйича онлайн қидирувлар 2022 йил ноябрда ChatGPT ишлай бошлагандан бери анча ошган. 2030 йилгача сунъий интеллект бозори 800 фоизга, 1,8 трлн долларга ўсиши тахмин қилиняпти.

Оксфорд луғати эса ҳали йил сўзини танламади. Унга кўра, танланадиган йил сўзи айнан шу йилнинг ўзида ўйлаб топилган бўлиши шарт эмас. Бироқ шу муддат давомида эътиборда бўлган ва таниқли сўз бўлиши керак. Луғат тез орада бу сўз танлаб олиниб эълон қилинишини билдирган. Merriam-Webster луғати ҳам ҳали йил сўзини танламади.

Кэмбриж луғати эса "галлюцинация қилмоқ" (hallucinate) сўзини 2023 йил учун танлади. Бу сўз ҳам сунъий интеллектга оид тарзда танлади. Сунъий интеллект галлюцинация қилса, у ёлғон ахборот ишлаб чиқараётган бўлади.

Луғатнинг ёзишича, сунъий интеллектдан фойдаланишнинг оммалашиши сабаб “галлюцинация” сўзининг унга оид янги маъноси ишлатила бошланди ва луғатга киритилди.

Маълумот учун: 2022 йилда Коллинз луғати “пермаинқироз” сўзини йил сўзи сифатида танлаган. Бу сўз билан пандемия, об-ҳаво шароитининг оғир келиши, Украинадаги можаро, 2022 йилдаги бошқа даҳшатли воқеаларни изоҳлаган. Merriam-Webster луғати эса ўтган йили “газлайтинг” сўзини “йил сўзи” сифатида танлаган.