Россияда журналист аёл президентлик сайловида иштирок этиши мумкин

17 декабр, якшанба куни ташаббус гуруҳи Россия президенти сайловида журналист Екатерина Дунцованинг номзодини қўллаб-қувватлади. Москва технополисининг конгресс марказида бўлиб ўтган йиғилишда 700 дан ортиқ киши қатнашди. Унда Россия Федерацияси Марказий сайлов комиссияси (МСК) вакили ҳам иштирок этди. 

Ташаббус гуруҳи йиғилишига икки нафар полициячи келди, деб хабар берди «7×7 – Горизонтальная Россия» Telegram-канали. Ҳуқуқ-тартибот идоралари ходимларининг таъкидлашича, уларга Дунцова ташаббускор гуруҳи йиғилишига ҳеч қандай алоқаси бўлмаган қўнғироқ келиб тушган. 

Эндиликда ташаббускор гуруҳ Марказий сайлов комиссиясида рўйхатга олиниши керак. Шундан сўнг, 25 январгача Дунцова ўз номзодини кўрсатиш учун Россия вилоятлари аҳолисидан камида 300 минг имзо тўплаши керак, уларнинг ҳақиқийлиги ҳам текширилади. 

Екатерина Дунцова - журналист ва кўнгилли қидирув-қутқарув гуруҳининг координатори, Ржев шаҳар кенгаши депутати бўлиб ишлаган. У 16 ноябр куни президентликка номзодини қўйиш ниятини маълум қилди ва бу қарорини «сўнгги ўн йил давомида мамлакат нотўғри йўналишда: тараққиёт йўлида эмас, балки ўз-ўзини йўқ қилиш йўлида кетаётгани» билан изоҳлади. Дунцова урушни тўхтатиш, демократик ислоҳотлар ва сиёсий маҳбусларни озод этиш тарафдори. 

Декабр ойи бошида Дунцова ВТБ банк тарафдорларига молиявий ёрдам сўраб мурожаат қилганидан кейин унинг номига пул ўтказмаларини блоклаб қўйганини маълум қилди.