20 млн долларлик талон-торож ишида гумонланаётган Эркин Мансуров очиқда экани маълум бўлди

Бугун, 17 январ куни Халқ депутатлари Бухоро вилояти кенгашининг 90-сессияси бўлиб ўтди. Вилоят ҳокимлиги матбуот хизмати эълон қилган суратлардан кўринишича, сессияда Марказий банкнинг Бухоро вилояти бошқармаси бошлиғи Эркин Мансуров ҳам иштирок этган.

Эркин Мансуров ўтган йили охиридаги коррупцияга қарши кураш тадбирлари доирасида қўлга олинган эди. У ўзлаштириш ёки растрата йўли билан талон-торож қилиш ҳамда мансаб сохтакорлигида гумонланаётганди.

Kun.uz манбасига кўра, Мансуров ноқонуний кредит ажратиш орқали қарийб 20 млн доллар миқдоридаги пул маблағлари талон-торож қилингани ҳолати бўйича фигурантлардан бири деб кўрилган.

17 январ куни Марказий банк ахборот хизматининг Kun.uz'га маълум қилишича, Эркин Мансуров лавозимидан олинмаган ва айни пайтда ўз фаолиятини одатдаги тартибда давом эттирмоқда.

Прокуратура тизимидаги манбаларга кўра, МБнинг Бухоро вилояти бўйича бошлиғига нисбатан Жиноят кодексининг тегишли моддалари бўйича айб эълон қилиниб, унга нисбатан гаров эҳтиёт чораси қўлланган..