Украина БМТ экспертлари Ил-76 қулаган жойни текширишини талаб қилмоқда

Украина ҳукумати халқаро мустақил экспертлар томонидан Белгород вилоятида Ил-76 самолёти қулаган жойни текширишни талаб қилмоқда, ҳодиса оқибатида, Россия Федерацияси маълумотларига кўра, 65 нафар украиналик ҳарбий асир ҳалок бўлган. Олий раданинг инсон ҳуқуқлари бўйича вакили Дмитрий Лубинец БМТ ва Халқаро қизил хоч қўмитасига ҳалокат жойини текширишни сўраб мурожаат қилди. «Украина Ил-76 самолёти ҳалокати бўйича шаффоф халқаро тергов ўтказилишини талаб қилади», — деб ёзди Лубинец 25 январ, пайшанба куни Facebook ижтимоий тармоғида.

Омбудсманнинг сўзларига кўра, у Киевга Россия ушбу ташкилотларни ҳарбий асирларни самолётда ташигани ҳақида хабардор қилгани ёки қилмагани бўйича ҳам маълумот беришни сўраган. Шу билан бирга, Дмитрий Лубинец халқаро экспертлар Россия Федерациясининг «баёнотлари ва айбловлари»га қарамай, «Оленовкадаги фожиа ҳолатида» бўлгани каби, ҳалокат жойини текширишга рухсат берилмаслигига ишонч билдирди.

«Ҳарбий асирлар учун жавобгарлик уларни ушлаб турган томонда»

Бундан ташқари, Лубинец ҳалокат куни Украина ва Россия Федерацияси ўртасида асирларни алмашиш режалаштирилганлигини тасдиқлади. «Женева конвенцияларига кўра, ҳарбий асирларнинг ҳаёти ва соғлиғи учун тўлиқ жавобгарлик уларни ушлаб турганлар зиммасига тушади. Бундан ташқари, ҳарбий асирларни олиб ўтаётган давлат уларнинг хавфсизлигини тўлиқ таъминлаши ва асирларнинг ҳаракатланиши тўғрисида ХҚХҚга хабар бериши керак. Бу ҳолатда масъулият Россия зиммасига юклатилади», - дея таъкидлади у.

Омбудсманнинг сўзларига кўра, ҳозирда «самолётда кўп одамлар бўлганлиги ҳақида ҳеч қандай маълумот йўқ». «Менинг фикримча, бу Россия Федерацияси Украинага қарши ташвиқот ахборот кампаниясини режалаштирганига яққол мисолдир. Ишонаманки, душман ҳарбий асирлар масаласидан Украина ичидаги вазиятни беқарорлаштириш ва бизнинг қўллаб-қувватлашни камайтириш учун фойдаланишда давом этади», - дея қўшимча қилди у.

«СБУ» самолёт ҳалокати юзасидан текширув бошлади

Айни вақтда, Украина хавфсизлик хизмати (СБУ) Ил-76 самолётининг Белгород вилоятида қулаши ҳолати юзасидан текширув бошлади. Уруш қонунларини бузиш моддаси бўйича жиноий иш очилди, деб ёзади «РБК-Украина» ва «Украинская правда» махсус хизматга таяниб. Украина президенти Володимир Зеленский аввалроқ Киев Ил-76 ҳалокати бўйича халқаро тергов ўтказилишини талаб қилишини айтган эди.

Ил-76 ҳарбий-транспорт самолёти 24 январ куни Белгород вилоятининг Корочанск туманида Яблоново қишлоғи яқинидаги далага қулаб тушди. Вилоят губернатори Вячеслав Гладковнинг сўзларига кўра, бортдаги барча одамлар ҳалок бўлган. Telegram’даги «Важные истории» ва «ЧТД» каналлари Россия мудофаа вазирлигига таяниб, Ил-76 бортида алмашиш учун олиб кетилаётган 65 нафар украиналик асир, шунингдек, 6 нафар экипаж аъзоси ва 3 нафар ҳамроҳлик қилувчи шахс бўлганини маълум қилди. Россия мудофаа вазирлиги ҳалокатни «террор ҳужуми» деб атади ва бунинг учун Киевни айблади. Москва талаб қилган БМТ хавфсизлик кенгашининг шошилинч мажлиси 25 январга белгиланганди.