Украина бешинчи йилки уруш ҳолатида. Асримизда ҳеч бир давлат бунчалик узоқ вақт уруш ҳолатида бўлмаган. Лекин шундай қийин дамларда, одамлар амаллаб жон сақлаётган, ҳар куни юзлаб ёш йигитлар мустақиллик учун курашда жон бераётган кунларда ҳам мулозимлар давлатни ўмаришдан чарчамаяпти.
Украина азалдан энг коррупциялашган давлатлар қаторида тилга олинади, европаликлар ҳам айнан шу сабаб Киевни Европа Иттифоқига қўшишга иккиланиб турибди. Европадаги шериклар талаби билан ташкил этилган НАБУ миллий аксилкоррупция бюроси яна бир шов-шувли коррупцион иш очди.
Президентдан ҳам мустақил ишлайдиган идора Украина бош прокуратураси мулозимлари марказида бўлган навбатдаги ишга «Карфаген» деб ном берди. Унга кўра, бош прокурор ўринбосари одамларни алдаб пулини олган колл-марказларни пул эвазига ҳимоя қилиб келган.
Нима гап ўзи?
Украина бош прокуратураси мулозими халқаро ҳуқуқий ҳамкорлик департаменти раҳбари ўринбосари Сергей Кропива бу галги операция марказида. У ишни хотиними, ўйнашими хуллас Елизавета Ивахненко деган аёл орқали бошқарган. Жиноий гуруҳ украинларни алдаб пулини олиш билан шуғулланган колл-марказларни ҳимоя қилган, прокуратура мулозими уларга «пуштипаноҳ» бўлган. Сиз яхши тушунадиган русча жиноий жаргонда айтганда, «кришоват» қилган.
Икковлон 2 миллион доллар атрофида пора олишда гумонланмоқда. Уларнинг НАБУ эълон қилаётган телефон суҳбатларини эшитсангиз, ҳайратдан ёқа ушлайсиз. Ишда «Муза» ва «Қиролича» деб тилга олинган Елизавета бош прокуратурадаги севгилисига уни тезроқ каттароқ ишга, масалан таълим вазири ўринбосарлигига жойлаб қўйишни сўраган. Таълимдан ўғирлаш осон эканини бу учига чиққан порахўрлар жуда яхши билади ахир. Ҳамма ерда ҳам таълим тизими ўғрилик қилиш учун энг қулай жойлардан.
Яна бир суҳбатда аёл бизнесдаги шериги Instagram'дан барча расмларни ўчиришни сўраганидан нолиган. «У расмларда мен «Порше», «Лоро Пиана», «Мими» билан кўринганман, тушуняпсанми? Шуба арзон турмаслигини ҳам билиб қолишлари мумкин. Нима энди, қиммат занжирлар, қиммат соатлар тақмаслигим керакми?» деган «бечора» аёл.
Бош прокурор қочди
НАБУ очган бу ишнинг охири катта эҳтимол Украина бош прокурори Руслан Кравченкога бориб тақаларди. Лекин президентдан мустақил ишлайдиган НАБУчилар бунга улгуришмади. Ўтган йили Украина тарихида энг эрта 35 ёшда бош прокурор бўлган Кравченко гўёки «Парижга меҳнат сафари билан боришни» баҳона қилиб, Украинадан жуфтакни ростлади.
