ХОҚ Россия ва Беларус спортчиларига атлетлар парадида иштирок этишни тақиқлади

Нейтрал мақомдаги спортчилар Париждаги ёзги Олимпиада очилишида делегациялар парадида қатнашмайди, чунки улар индивидуал спортчилардир, дея тушунтирди ХОҚ.

Фото: Michel Euler/AP/dpa/picture alliance

Халқаро олимпия қўмитаси (ХОҚ) Россия ва Беларус спортчиларининг Париждаги ёзги Олимпия ўйинларида спортчилар парадида иштирок этишига рухсат бермади. ХОҚнинг 19 март, сешанба куни эълон қилган баёнотида айтилишича, нейтрал спортчилар очилиш маросимида делегациялар парадида иштирок этмайди, чунки улар индивидуал спортчилардир.

Бироқ, парадда иштирок этишга рухсат берилмаган спортчилар ушбу тадбирда қатнашиш имкониятига эга бўлади, дея қўшимча қилди ташкилот. Қўмитанинг таъкидлашича, худди шундай сценарий 1992 йилда Барселонада бўлиб ўтган Олимпиадада Югославия «мустақил иштирокчилари»га нисбатан қўлланган.

ХОҚ 36 нафар россиялик ва Беларус паспортига эга 22 нафар спортчи Франция пойтахтида бўлиб ўтадиган Олимпиадага йўлланма олишини кутмоқда. Уларнинг Ўйинларнинг ёпилиш маросимида иштирок этиши тўғрисидаги қарор кейинроқ қабул қилинади, дейилади ташкилот хабарида.

Ўйинларга Россия ва Беларусдан нейтрал спортчиларни қабул қилиш

ХОҚнинг 2023 йил декабрида қабул қилинган қарорига кўра, Россия ва Беларус спортчиларига ўз мамлакатлари байроқлари ва бошқа миллий атрибутларсиз фақат нейтрал мақомдаги мусобақаларга рухсат берилади. Россия ҳарбийларининг Украинага ҳужумини фаол қўллаб-қувватлаётган, шунингдек, Россия ёки Беларус армияси, ҳуқуқ-тартибот идоралари ва ушбу давлатларнинг хавфсизлик идоралари билан алоқадор бўлган спортчилар ўйинларда қатнаша олмайди.

Россия Олимпия қўмитаси (РОҚ) россияликларнинг Париждаги ўйинларда иштирок этиши учун қўйилган шартларни «адолатсиз» деб атади. Бироқ, Россия томони РОҚ «бойкот йўли»ни танламаслигини таъкидлади.

Парижда XXXIII ёзги Олимпия ўйинлари 26 июлдан 11 августгача бўлиб ўтади. Франция пойтахти 1900 ва 1924 йилларда ёзги Олимпия ўйинларига мезбонлик қилган.