Сунъий интеллект чиплари бозорида етакчи Nvidia компанияси раҳбари атрофидаги жанжал душанба куни янги босқичга чиқди. Бундан олдин, 29 октябрда New York Times компания бош директори Женсен Ҳуангнинг бир аёл билан яқин муносабатда бўлганини ёзганди. Газетага кўра, АҚШ разведкаси бу аёлни Пекин учун маълумот тўплаган деб ҳисоблайди.
8 ноябр куни Ҳуанг турмуш ўртоғига хиёнат қилганини тан олди. Ўша куни АҚШ президенти Доналд Трамп уни ҳимоя қилди. 9 ноябрда эса Оқ уйда бу иш билан Федерал қидирув бюроси (ФҚБ) ҳам шуғулланаётганини айтди. «Биз буни ўрганамиз. ФҚБ буни бошқа бир масала юзасидан ўрганаётганини биламан», деди у.
Трамп ФҚБ айнан нимани текшираётганини айтмади. NYT’нинг тахминича, гап Адлия вазирлигининг Megaspeed компанияси бўйича тергови ҳақида бўлиши мумкин. ФҚБ шу вазирлик таркибига киради.
Президент ўша куни Ҳуанг билан гаплашганини ҳам айтди. «У ‘унинг жосус эканини умуман билмасдим’, деди ва мен унга чиндан ишонаман», деди Трамп.
Элис Ҳуанг ким?
Reuters’нинг ёзишича, Элис Ҳуанг (хитойча исми Ҳуанг Ле) сунъий интеллект чиплари бозорига Хитой молия соҳасидан кириб келган. Тахминан 42 ёшли тадбиркор аввал тележурналист бўлган, кейин банк ва инвестиция соҳасида ишлаган. У Женсен Ҳуангга қариндош эмас.
Унинг чип бизнесига алоқаси асосан Megaspeed орқали. Вашингтондаги C4ADS таҳлилий марказига кўра, Элис Ҳуанг 2023 йил мартида бу компаниянинг назорат пакети эгасига айланган.
2023 йил охирида Megaspeed’нинг барча акциялари Сингапурдаги SwiftData фирмасига ўтган. Бу фирмани аслида ким бошқариши номаълум. C4ADS таҳлилчилари фикрича, Элис Ҳуанг шундан кейин ҳам компанияга таъсир ўтказган бўлиши мумкин: у кейинроқ ҳам Megaspeed раиси сифатида таништирилган.
