Сенегалда бир кун аввал бўлиб ўтган президентлик сайловларида мухолифат номзоди Бассиру Диомайе Фай 53,7 фоиз овоз олди. Бундан Сенегал миллий автоном сайлов комиссияси маълумотлари дарак бермоқда.
Диомайе Файнинг асосий рақобатчиси, ҳукмрон коалиция вакили Амаду Ба 36,2 фоиз овоз олди.
Таъкидланишича, бу дастлабки маълумотлар бўлиб, сайлов участкаларининг 90 фоизида бюллетенларни санаб чиқишдан сўнг олинган. Сайловнинг расмий натижалари ҳали эълон қилинмади.
Айни пайтда, Сенегалнинг амалдаги президенти Маки Сал ва ҳукмрон коалиция вакили Амаду Ба Диомайе Файни президентлик сайловларининг биринчи босқичидаги ғалабаси билан табриклади.
Бассиру Диомайе Фай 44 ёшда. У Сенегал президенти этиб сайлангани якуний тарзда тасдиқланса, Африканинг энг ёш президентига айланади.
