Париж мэри 2024 йилги Олимпиадада Россия ва Беларуснинг иштирок этишига қарши

«Мен россиялик ва беларуслик спортчиларга уларни Парижда кўришдан хурсанд бўлмаслигимни айтмоқчиман», деди Анн Идалго. У Париж Олимпиада ўйинлари давомида украиналик спортчиларни қўллаб-қувватлашига ваъда берди.

Анн Идалго Фото: Ait Adjedjou Karim/ABACA/IMAGO

Париж мэри Анн Идалго ёзда Франция пойтахтида бўлиб ўтадиган Олимпиада ўйинларида Россия ва Беларус спортчилари иштирок этишига қарши чиқди, деб ёзади Парижнинг Le Monde газетаси 30 март куни кечқурун. «Россия ва Беларус спортчиларига уларни Парижда кўришдан хурсанд бўлмаслигимни айтмоқчиман», деди Идалго 28 март куни Киевга ташрифи чоғида. Париж мэрининг бу баёноти ҳақида аввалроқ хабар қилинмаган.

Анн Идалгонинг қўшимча қилишича, Париж Олимпиада ўйинлари давомида украиналик спортчиларни қўллаб-қувватлайди. «Париж сизни қаҳрамонлар сифатида кутиб олади, Парижда ўзингизни уйдагидек ҳис қиласиз», деб ваъда берди у.

Le Monde таъкидлашича, Идалго спортчиларнинг Олимпиададаги иштироки бўйича қарор қабул қилиш ваколатига эга бўлмаса-да, унинг сўзлари, шубҳасиз, Россия расмийларини ғазаблантиради.

Россия Ташқи ишлар вазирлиги расмий вакили Мария Захарова Идалгонинг сўзларини шарҳлар экан, «ҳозирда Россияда кенг тарқалган баъзи француз маҳсулотларини танлашни ва уни кўришдан хурсанд бўлмасликни эълон қилишни» таклиф этди.

Анн Идалго ўз позициясини ўзгартирди

Ўтган йилнинг январ ойида Анн Идалго Олимпиадада Россия ва Беларус спортчиларининг нейтрал байроқ остида иштирок этишини қўллаб-қувватлашини маълум қилган эди, бироқ бир неча ҳафта ўтгач, Le Monde таъкидлашича, Париж мэри ўз позициясини ўзгартириб, нейтрал байроқ мавжуд эмаслигини айтди. Унинг таъкидлашича, Франция бошқа давлатга ҳужум қилган мамлакатни кутиб олиш ниятида эмас.

Халқаро олимпия қўмитаси (ХОҚ) 2023 йил декабр ойида Украинадаги уруш муносабати билан Россия ва Беларусга қўйилган санкциялар доирасида ушбу давлатлар спортчиларининг Парижда шахсий спорт турлари бўйича ўйинларда нейтрал мақомда иштирок этиши ҳақида қарор қабул қилди. Март ойида ХОҚ 12 нафар россиялик ва етти нафар беларуслик спортчига Олимпиадада қатнашиш ҳуқуқини берди. Ўйинларда Россиядан жами 54 нафаргача, Беларусдан эса 28 нафаргача спортчи иштирок этиши мумкин. Баъзи россиялик спортчилар аллақачон ўйинларда нейтрал мақомда қатнашишни истамаслигини эълон қилган.

Париждаги ёзги Олимпия ўйинлари 26 июлдан 11 августгача бўлиб ўтади. Паралимпия ўйинлари 28 август-8 сентябр кунлари ўтказилиши режалаштирилган.