АҚШ президенти Доналд Трамп Nvidia бош директори Женсен Ҳуангнинг рафиқасига хиёнат қилгани ва жосусликда гумонланган хитойлик аёл билан муносабатда бўлганини тан олганидан кейин юзага келган можаро юзасидан муносабат билдирди.
«Бугун мен Женсен билан гаплашдим. У менга бу аёл жосус бўлганини умуман билмаганини айтди ва мен унга тўлиқ ишонаман», – деди Трамп журналистлар саволларига жавобан.
У Ҳуангни мамлакат учун «улкан ишларни амалга оширган» ва «юксак ахлоқий фазилатларга эга инсон» деб билишини қўшимча қилган.
«Биласизми, ўйлаб қарасангиз, унда технологиялардан 10 йил олдинга ўзиб кетган чип бор. Конструкцияси мураккаблиги туфайли уни ҳатто нусхалаб ҳам бўлмайди. Мен ҳеч қандай муаммо туғилмаслигига умид қиламан. Унинг баёнотини ўқиб чиқдим ва у қаттиқ қийналаётганига ишончим комил – айниқса, ўз оиласи, ўзи севадиган рафиқаси сабабли», – деди Трамп.
Nvidia раҳбари у билан Осиё бўйлаб саёҳатга бориши имкониятлари ҳақидаги саволга жавобан АҚШ президенти «албатта, уни ўзи билан олиб кетиши»ни айтди. «Мен унинг ёмон иш қилганини эшитганим йўқ. Унинг ким биландир алоқаси бор эди, лекин бошқаларнинг ҳам ким биландир алоқаси бор», – дея қўшимча қилди Трамп.
Американинг Nvidia компанияси – дунёдаги энг қиммат компаниялардан бири ҳисобланади (Apple’дан кейинги иккинчи ўринда). Шу кунларда The New York Times газетаси Женсен Ҳуангнинг Nvidia’дан чиплар харид қилган компанияда ишлаган хитойлик аёл билан ишқий романи ҳақида хабар тарқатди. Кўп ўтмай Ҳуанг ходимларга ёзган хатида Хитой фуқароси билан ишқий муносабатда бўлганини тан олди ҳамда рафиқаси ва ҳамкасбларидан узр сўради.
«Рафиқам ва оиламга: мен сизларни севаман. Биламан, узр сўраш қилган ишимни ўзгартира олмайди. Оиламиз бу синовни енгиб ўтишига ва вақт ўтиши билан мен сизларнинг ишончингизни яна қозона олишимга умид қиламан», – дея ёзган у.
У «мамлакат ва компанияни» севишини, шунингдек, тергов давомида Nvidia бош директори лавозимини тарк этмаслигини қўшимча қилган.
Женсен Ҳуанг рафиқаси Лори билан университетда ўқиган чоғида танишган ва 40 йилдан ортиқ вақт давомида бирга яшаб келади. Рафиқаси у билан бирга ишлайди ва кўпинча оммавий тадбирларда унга ҳамроҳлик қилади. Женсен Ҳуангнинг ўғли Спенсер, қизи Мэдисон ва куёви Нико Капрез ҳам Nvidia’да раҳбарлик лавозимларида ишлайди.
Ҳозирда Nvidia’нинг капитализацияси 4,5 триллион долларга баҳоланади. Можаро фонида Nvidia акциялари 9 ноябр куни 6 фоиздан кўпроққа арзонлашди: Франкфурт биржасида қимматли қоғозлар нархи 169,76 евродан тахминан 158 еврогача тушди.
