Интернетда яна бир шубҳали лойиҳа: “Sun Eco” одамларни қуёш панелларига пул тикишга чақиряпти

“Sun Eco Group” феврал ойида ижтимоий тармоқлар орқали ўзини дунёдаги энг йирик ва инновацион қуёш компонентларини ишлаб чиқарувчилардан бири деб таништириб, бутун дунё бўйлаб фотоволтаик энергия ишлаб чиқариш базаларини қураётгани ва ишлаб чиқарилган электр энергиясини миллий тармоққа улаб даромад олишини маълум қилган.

“Sun Eco” қурилиш лойиҳаси катта маблағ талаб қилгани учун инвесторлардан пул йиғаётганини таъкидлаган.

“Лойиҳада қатнашиш ва оддий ходимга айланиш учун 60 АҚШ доллари керак бўлади, қатнашгандан кейин кунлик фойда эса 2 АҚШ долларини ташкил қилади”, – дейилади тарқатилган хабарларда.

Шундан кейин лойиҳанинг бир нечта гуруҳлари очилиб, одамлар пул ўтказаётгани ва кунлик даромадини ола бошлагани ҳақида хабарлар қўйиб борилган.

Инвесторлар учун очилган Telegram-гуруҳ админларидан бири, Анвар Ҳамдамов исмли шахс “Sun Eco” компанияси ҳақида маълумот бераркан, бу компания 2020 йилда АҚШнинг Колорадо штатида ташкил этилгани, бутун дунё бўйлаб қуёш маҳсулотлари, қуёш энергияси лойиҳалари бўйича етакчи глобал провайдер ҳисобланишини иддао қилади.

Лойиҳа веб-сайтига кирилса, Американинг “Sun Eco” компанияси сайтига йўналтириладиган ҳавола ва пул тикиш йўриқномасидан бошқа нарса йўқлигини кўриш мумкин.

Шуниси аниқки, Американинг “Sun Eco” компанияси Ўзбекистон бозорида шундай лойиҳа бошлаётгани борасида бирор расмий маълумот йўқ. Улар Америка компанияси номидан фойдаланаётганини тахмин қилиш мумкин.

Гуруҳ админларидан бири ҳатто Ўзбекистон ҳукуматининг кўплаб таклифларидан сўнг компания бозорга кириб, ҳукумат билан 10 йил муддатга шартнома имзолаганини ҳам айтган.

Энергетика вазирлиги матбуот котибининг Kun.uz'га маълум қилишича, бундай номдаги компания ҳукумат билан шартнома имзоламаган.

“Бу компаниянинг вазирликка умуман алоқаси йўқ”, – дейилади матбуот хизмати берган изоҳда.

Бу лойиҳанинг яна бир шубҳали томони шундаки, инвесторлар мобил илова орқали криптовалютада пул тикишлари керак.

Бундан ташқари, Telegram-каналдаги постлардан бирида компания номи аввал “Oasis Group” бўлганини кўриш мумкин. Шунингдек, Telegram-канал админи Анвар Ҳамдамов 3 апрел куни YouTube'га жойлаган видеода ҳам “Sun Eco”га пул тикиш учун иловага oasisps.com ҳаволаси орқали кириш мумкинлигини кўрсатган.

Аввалроқ, Kun.uz Ўзбекистонда “powerbank ижараси”дан даромад олиш таклиф этилаётгани ва бу навбатдаги молиявий пирамида бўлиши мумкинлиги ҳақида ёзганди.

Эслатиб ўтамиз, аввалроқ “Смартболла” лойиҳаси ҳам муҳокамаларга сабаб бўлганди. Компания бир қатор мобил иловаларни ишга туширишини айтиб, инвесторлардан пул йиғган, аммо бир неча йилдан буён бу лойиҳаларнинг ҳеч бири ишга туширилмаган.