Шимолий Македониядаги президентлик сайловларида мухолифатчи аёл ғалаба қозонди

Шимолий Македониядаги президентлик сайловларида энг йирик мухолифат партияси – «Македония ички инқилобий ташкилоти – Македония миллий бирлиги демократик партияси» вакили Гордана Силяновска-Давкова ғалаба қозонди. Сайлов бюллетенларининг 79,2 фоизи ҳисобланганидан кейин у 64,8 фоиз, унинг рақиби, амалдаги президент Стево Пендаровски эса 29,2 фоиз овоз тўплаган. Бу ҳақда 9 май, пайшанбага ўтар кечаси мамлакат Давлат сайлов комиссияси маълум қилди.

Социал-демократ Пендаровски мағлубиятини тан олган. «Натижалар аниқ, лекин менинг виждоним тоза, натижалардан келиб чиқиб, ғолибларни табриклайман ва келгуси беш йилда муваффақиятли ишлашларини тилайман», деди у.

24 апрел куни бўлиб ўтган президентлик сайловининг биринчи босқичида Силяновска-Давкова 40 фоизга яқин, Пендаровски эса 20 фоиздан кам овоз олган.

Мухолифат парламент сайловларида ҳам ғалаба қозоняпти

Айни пайтда Шимолий Македонияда парламент сайловлари ҳам бўлиб ўтмоқда. Уларда «Македония ички инқилобий ташкилоти – Македония миллий бирлиги демократик партияси» бошқарадиган «Сизнинг Македониянгиз» коалицияси ғалаба қозоняпти. Сайлов бюллетенларининг 78,2 фоизини қайта ишлагандан сўнг, у 42,5 фоиз, Македония социал-демократик иттифоқи эса 14,5 фоиз овозга эга бўлгани аниқланди.

9 май куни мамлакатда янги ҳукуматни шакллантириш бўйича музокаралар бошланиши кутилмоқда. Натижада, «Македония ички инқилобий ташкилоти – Македония миллий бирлиги демократик партияси» етакчиси Христиан Мицкоски бош вазир бўлиши мумкин.

Сайлов натижалари мамлакатнинг ЕИга йўлини белгилайди 

«Македония ички инқилобий ташкилоти – Македония миллий бирлиги демократик партияси» ва Македония социал-демократик иттифоқи ўртасидаги асосий сайловолди баҳси Шимолий Македониянинг Европа Иттифоқига қўшилиши шартлари атрофида бўлди. ЕИ аъзоси бўлган Болгария Шимолий Македония конституцияда болгар озчилик мақомини мустаҳкамламагунча Скопе билан музокаралар бошланишига қарши чиқди. Пендаровски бунга рози бўлишга тайёр эди, аммо «Македония ички инқилобий ташкилоти – Македония миллий бирлиги демократик партияси» мамлакат Европа Иттифоқига аъзо бўлганидан кейингина бундай тузатишларни киритмоқчи.

2022 йил июл ойида Скопедаги парламент Болгария билан Шимолий Македониядаги болгар озчиликни тан олиш тўғрисидаги келишувни тасдиқлади. Овоз бериш жараёнида «Македония ички инқилобий ташкилоти – Македония миллий бирлиги демократик партияси» депутатлари норозилик белгиси сифатида мажлислар залини тарк этди.

2022 йил июн ойида Болгария парламенти конституциявий тузатишлар киритиш орқали Шимолий Македониядаги болгар озчилигининг ҳуқуқларини ҳимоя қилишни, шунингдек, Скопенинг Болгария билан яхши қўшничилик муносабатларини сақлаб қолиш мажбуриятини ўз ичига олган муроса келишувини маъқуллади.