Байден Швейцариядаги Украина бўйича тинчлик саммитини ўтказиб юбориши мумкин

АҚШ президенти Жо Байден бир вақтнинг ўзида Калифорнияда бўлиб ўтадиган маблағ йиғиш тадбири туфайли келаси ой Швейцарияда ўтказиладиган Украина бўйича глобал тинчлик саммитини ўтказиб юбориши мумкин. Бу ҳақда 23 май, пайшанба куни манбаларга таяниб, Bloomberg хабар берди. 

Уларнинг айтишича, Америка етакчиси G7 етакчилари йиғилишида иштирок этиш учун Италияга учади, бироқ 15 июн куни Лос-Анжелесга ўзининг қайта сайланиш кампанияси учун маблағ йиғиш тадбирида қатнашиш учун йўл олади. Тадбирда Байден билан бирга Ҳолливуд актёрлари Жорж Клуни ва Жулия Робертс, шунингдек, АҚШнинг собиқ президенти Барак Обама ва телебошловчи Жимми Киммел иштирок этиши кутилмоқда.

Бу қарор, Bloomberg маълумотларига кўра, унинг рақиби Доналд Трампнинг бир қарорга келолмаётган штатларда машҳурлиги фонида Байден учун сайлов кампанияси устуворлигини таъкидлайди. Ўтган ойда Трамп маблағ йиғиш бўйича илк бор Байдендан ўзиб кетди ва 76 миллион долларгача етди.

Агентлик суҳбатдошларига кўра, тинчлик саммитида АҚШ вице-президенти Камала Харрис ҳам бўлмайди. 

Украина бўйича бешинчи конференция

Украина бўйича глобал тинчлик саммити 15-16 июн кунлари Люцерн яқинида жойлашган Бюргеншток курортида бўлиб ўтади. Анжуманда 100 га яқин давлат иштирок этиши кутилмоқда. Саммит 2023 йилда Дания, Саудия Арабистони ва Малтада, 2024 йил 14 январда Давосда бўлиб ўтган Украинадаги урушни тинч йўл билан ҳал қилиш бўйича тўртта олдинги конференцияга ўхшаб кетиши керак. 

ОАВ маълумотларига кўра, Украина Бюргенштокдаги учрашувга Хитой раҳбари Си Жинпингни ҳам таклиф қилган. Украинага қарши урушни тугатиш имкониятлари муҳокама қилинадиган Швейцариядаги саммитга Россия таклиф қилинмади. Москва, ўз навбатида, Россия Федерацияси иштирокисиз бундай учрашувнинг мантиқий бўлмаслигини таъкидлади.