Швейцария ҳукумати сайтида 27 сентябр, якшанба куни эълон қилинган расмий натижаларга кўра, «Швейцария бетарафлигини сақлаш» ташаббуси аҳоли томонидан қўллаб-қувватланмаган.
Ташаббусни ўнг консерватив Швейцария халқ партиясига яқин бўлган «Швейцария учун» — Pro Schweiz бирлашмаси илгари сурган.
Унинг муаллифлари фикрича, бетарафлик мамлакат Конституциясида мустаҳкамланган бўлса-да, ҳукумат Украинадаги уруш муносабати билан Европа Иттифоқининг Россияга қарши санкцияларига қўшилиб, аралашмаслик тамойилини заифлаштирган.
Санкциялар ва ҳарбий ҳамкорликни чеклаш таклиф қилинган
Ташаббус муаллифлари Конституцияда «доимий ва қуролланган» бетарафлик тамойилини белгилашни таклиф қилган. Бунда мамлакатнинг бетараф мақомни сақлаган ҳолда ўзини ҳарбий жиҳатдан ҳимоя қилишга тайёр туриши назарда тутилган.
Шунингдек, Швейцариянинг НАТО каби ҳарбий иттифоқларга қўшилиши ёки улар билан ҳамкорлик қилишига қонуний тақиқ жорий этиш кўзда тутилган. Фақат мамлакатнинг ўзи ҳужумга учраган ҳолатлар бундан мустасно бўлиши керак эди.
Ташаббус санкцияларга нисбатан ҳам кенг қамровли чекловларни назарда тутган. Агар ўзгартишлар қабул қилинганида, ҳукумат иқтисодий санкцияларни фақат БМТ Хавфсизлик кенгаши маъқуллаганидан кейингина жорий эта оларди.
«Бетарафликни бефарқлик билан тенглаштирмаслик керак»
Швейцария халқ партиясидан ташқари мамлакатдаги барча йирик сиёсий кучлар ташаббусга қарши чиққан.
Ташқи ишлар вазири Иняцио Кассис теледебатларда Швейцария бетарафлиги амалиётда доимо муайян мослашувчанлик билан қўлланганини айтган.
Унинг таъкидлашича, бетарафликни бефарқлик билан тенглаштирмаслик керак. Вазир Швейцария ўз манфаатларини ҳимоя қилиш ёки тинчликни сақлашни важ қилиб, халқаро ҳуқуқ бузилишларига кўз юмиши мумкин эмаслигини билдирган.
Озиқ-овқат хавфсизлиги бўйича ташаббус ҳам рад этилди
Референдумда овоз берганларнинг 70 фоиздан ортиғи озиқ-овқат хавфсизлигига оид ташаббусни ҳам қўллаб-қувватламаган.
