НАТО давлатлари Зеленскийдан уларга босим ўтказмасликни сўради

НАТО давлатлари Володимир Зеленскийдан Украинанинг бу йил алянсга кириши жадвалини келишиб олишни талаб қилиб, уларга босим ўтказмасликни сўради, деб ёзади Британиянинг The Telegraph газетаси.

Фото: Alamy

Украина президенти Володимир Зеленскийдан НАТО давлатларидан бу йил ўз мамлакатини Шимолий Атлантика алянсига таклиф этишни талаб қилмаслик сўралди, деб ёзади Британиянинг The Telegraph газетаси 28 май, сешанба куни манбаларга таяниб. НАТОнинг навбатдаги саммитида иттифоқчилар Россия билан урушга тортилиши мумкинлигидан ташвишланиб, Украинанинг қўшилиши йўлида ҳеч қандай қадам ташламайди, деб ёзади газета.

Германия ва Қўшма Штатлар Вашингтондаги икки кунлик саммитда Киевга НАТОга аъзо бўлишнинг аниқ жадвалини таклиф қилишга қарши. Бу давлатлар «Украинанинг бу йил НАТО тўлиқ аъзолиги йўлидаги кейинги тараққиётига шубҳа билан қараяпти», деди Вашингтоннинг бу борадаги позициясидан хабардор манба. «Қўшма Штатлар Германия каби хавотирда бўлмаслиги мумкин, аммо (улар ҳам) Россия иттифоқнинг қолган қисмига таҳдид солаётганидан хавотирда», - дея қўшимча қилди у.

Зеленскийдан «имконсиз» нарсани талаб қилмаслик сўралди

НАТОнинг 75 йиллиги нишонланадиган июлдаги саммитга тайёргарлик чоғида Украина ҳамкорлари Володимир Зеленскийни алянсдан «имконсиз» нарсани талаб қилмаслик ҳақида огоҳлантирган. Газетанинг ёзишича, саммитда Украина президентига бу жараённи қўллаб-қувватлаш белгиси сифатида НАТОга аъзо бўлиш учун «кўприк» ёки «йўл» деб аталган нарса таклиф қилинади, бироқ аниқ муддат белгиланмайди.

НАТО бош котиби Йенс Столтенберг ва Шимолий Атлантика алянси давлатлари бир неча бор Украинани Россиядан ҳимоя қилишини қўллаб-қувватлашини таъкидлаб, НАТО эшиклари бунинг учун очиқ эканини таъкидлаган. 2024 йилнинг февралида Столтенберг Украина НАТОга ҳар қачонгидан ҳам яқинроқ эканини айтди. Шу билан бирга, НАТО Украинанинг ташкилотга кириши мумкин бўлган санани аниқ айтишдан бош тортмоқда.