Жаҳон | 14:50 / 08.06.2024
2577
3 дақиқада ўқилади

НАТО Украина бўйича махсус вакил лавозимини жорий этмоқчи

НАТОнинг Украинадаги «катта фуқаролик вакили» позицияси июл ойида алянс саммитида тақдим этилиши мумкин. Махсус вакил иттифоқчилар ёрдамини, жумладан, ҳарбий ёрдамни мувофиқлаштиради.

Фото: Getty images

НАТО Украинада ўзининг махсус вакили лавозимини ташкил этишни режалаштирмоқда, деб хабар берди Foreign Policy 7 июн, жума куни манбаларга таяниб. Уларга кўра, Шимолий Атлантика алянсининг Украинадаги «катта фуқаролик вакили» лавозими июл ойида блокнинг юбилей саммитида тақдим этилиши мумкин. Махсус вакил иттифоқчилар томонидан Украинага, жумладан, ҳарбийларга ёрдам беришни мувофиқлаштиради.

Foreign Policy суҳбатдошлари таъкидлаганидек, бундай қадам НАТОга Украинага ҳам, Россияга ҳам сиёсий сигналлар юбориш имконини беради. Алянснинг баъзи вакиллари махсус вакил тайинланишини Украинани қўллаб-қувватлашдаги навбатдаги қадам деб атаса, бошқалари буни НАТОга аъзо бўлишга интилаётган давлат учун «тасалли мукофоти» деб атамоқда. 

Аввалроқ АҚШ ва Германия Россия билан можаронинг кучайишидан хавотирланиб, жорий йилда Украинани НАТОга таклиф қилишга қарши чиққани маълум бўлган эди. Туркия Киевга ҳарбий ёрдам кўрсатишни мувофиқлаштириш иттифоқчиларнинг можарода фаолроқ иштирок этгани ҳақида таассурот қолдирмаслиги учун эҳтиёткорликка чақирди. 

Украинани қўллаб-қувватлаш бўйича чора-тадбирлар пакети бир қисми 

Украинани Россияга қарши курашда қўллаб-қувватлаш бўйича кенг кўламли чора-тадбирлар доирасида НАТО махсус вакилини тайинлаш муҳокама қилинмоқда. Унинг яна бир қисми Украинага беш йил муддатга 100 миллиардлик ёрдам фондини яратиш бўлиши мумкин, бироқ алянс иттифоқчилари НАТО бош котиби Йенс Столтенбергнинг тегишли ташаббусини қўллаб-қувватламади, деб хабар берди Bloomberg. 

Энди Столтенберг алянс аъзоларининг умумий миқдори 43 миллиард доллар бўлган жорий бадалларини сақлаб қолишни талаб қилмоқда. Маблағнинг ярми Қўшма Штатлар томонидан берилиши керак. НАТО бу Киевни қўллаб-қувватлаш даражасини, айниқса, ноябр ойида бўлиб ўтадиган АҚШ президентлик сайловлари нуқтайи назаридан олдиндан тахмин қилиш имконини беришига умид қилмоқда. 

Бу таклиф НАТО мамлакатлари орасида кенг қўллаб-қувватланмоқда. Битта савол - Венгриянинг позицияси, у Украинага ёрдамни кенгайтиришдан бош тортиш имкониятини беришни сўраяпти. 

Мавзуга оид