Қўшма Штатлар Украинага биринчи Patriot ЗРКни бир ярим йил аввал тақдим этган эди. Энди, NYT маълумотларига кўра, Байден Киевга иккинчи шундай ҳаво ҳужумидан мудофаа тизимини юборишга қарор қилган.
Украинанинг Россия ҳаво ҳужумларига қарши мудофаасини кучайтириш учун АҚШ президенти Жо Байден Киевга яна бир Patriot ҳаво ҳужумидан мудофаа тизимини тақдим этмоқчи. The New York Times (NYT) 11 июн, сешанба куни АҚШ маъмуриятидаги манбаларига таяниб ёзишича, Оқ уй раҳбари ўтган ҳафта юқори мартабали амалдорлар билан бир қатор учрашувлардан сўнг шундай қарорга келган. Миллий хавфсизлик кенгашининг стратегик алоқалар бўйича координатори Жон Кирби бу маълумотни тасдиқлашдан бош тортди.
NYT маълумотларига кўра, тилга олинган Patriot тизими ҳозир Полшада ва яқин кунларда Украинадаги фронтда жойлаштирилиши мумкин. Бу АҚШ Украинага тақдим этадиган иккинчи ҳаво ҳужумидан мудофаа тизими бўлади. Байден биринчисини етказиб беришни бир ярим йил олдин, Украина президенти Володимир Зеленский Россиянинг кенг кўламли ҳарбий ҳаракатлари бошланганидан бери АҚШга биринчи сафарини амалга оширганида ва Конгрессда нутқ сўзлаганида маъқуллаган. Вашингтон Украинага Patriot учун ракеталарни ҳам мунтазам етказиб беряпти.
Германия аллақачон Украинага иккита Patriot тизимини етказиб берган ва учинчиси ҳақида ваъда берган, ҳозирда украиналик аскарлар унда ўқитилмоқда.
