АҚШ собиқ биринчи хоними Мишел Обама ноябрда бўладиган президентлик сайловларида демократлар партияси номзоди сифатида қатнашиши мумкин. Бу ҳақда АҚШнинг қатор нашрлари ёзмоқда. Бундай миш-мишлар Жо Байден 28 июн куни Доналд Трамп билан дебатда жуда ёмон қатнашганидан кейин тарқалди. 90 дақиқалик дебат давомида Байденда кексалик аломатлари сезилиб қолди ва демократлар унинг чиқишини ҳалокат деб қабул қилишди.
Байден ҳозирча номзодини олмоқчи эмас, у 30 июн куни чиқиш қилиб, сайловда қатнашиши, Трампни енгишини айтди. Аммо барчаси августдаги демократлар қурултойида аниқ бўлади. Дебатгача Байден партиянинг ягона номзоди бўлишига шубҳа йўқ эди, чунки у праймеризда ғолиб бўлган. Аммо дебатдаги омадсизликдан кейин демократлар Байден ўрнига тетикроқ номзод излай бошлаган. Хўш, шундай бўлса, унинг ўрнини ким эгаллаши мумкин?
Камала Ҳаррис – АҚШ вице-президенти
Агар Байденга амалдаги президентлик вақтида нимадир бўлиб, президентлик ваколатларини бажара олмай қолса, унинг ўрнини қонун бўйича вице-президент Камала Ҳаррис эгаллайди. Бу жиҳатдан АҚШ тарихидаги илк аёл вице-президент «сиёсий меросхўр» ҳисобланади.
Унинг номзодини қўлловчи икки муҳим омил бор: биринчидан, Ҳаррис АҚШ президентлиги учун курашадиган илк қора танли аёлга айланади, бу тарихдаги илк қора танли президентни мамлакат тепасига олиб келган демократлар қарашларига мос. Иккинчидан, демократлар анчадан буён аёл президент сайлаш ҳақида орзу қилишади ва 2016 йил бу режалари амалга ошишига ҳам бир бахя қолганди.
Шу билан бирга, Ҳарриснинг рейтинги ҳавас қиларли даражада эмас. Бундан ташқари, Байден жамоасида Ҳаррис Трампга қаршилик қила олмайди деб ҳисоблашади.
Гэвин Нюсом – Калифорния губернатори
Номзодлар орасида энг машҳурларидан бири – АҚШдаги аҳоли сони ва иқтисодиёти бўйича энг йирик штат Калифорния губернатори Гэвин Нюсондир. Ўзи бу штатни ким бошқармасин, унинг рейтинги юқори бўлади, ҳатто бу актёр Арнолд Шварценеггер бўлса ҳам. Чунки Калифорнияга губернатор бўлиш АҚШ президенти бўлишдан осон иш деб бўлмайди. Мамлакатдаги энг либерал штатлардан бўлмиш Калифорния мустақил давлат бўлганида, дунёдаги энг бой бешинчи мамлакатга айланарди.
