Россия Киев бўйлаб ёпирилма зарба йўллади. Ракеталардан бири болалар шифохонасига келиб урилган

Россиянинг ТАСС агентлиги гувоҳларга таянган ҳолда Киевнинг Жуляни аэропорти ҳудудида ҳам портлаш овозлари эшитилгани ва «Артём» ҳарбий заводи зарба остида қолгани ҳақида хабар берган. РФ мудофаа вазирлиги ҳозирча бунга муносабат билдирмади.

Виталий Кличко ракеталардан бири Шевченково районидаги болалар шифохонаси биносига келиб урилганини маълум қилди. «Охматдет» болалар шифохонаси бўлимларидан бири шикастланган (шифохона олдин ҳам зарбага учраганди). «Охматдет»да иккита жарроҳлик амалиёти ўтказилаётган бўлган бўлим вайрон бўлган.

Украина соғлиқни сақлаш вазири Виктор Ляшко «Охматдет»да қурбонлар борлигини хабар қилган. Украина ФВДХ маълумотига кўра, «Охматдет»га зарба оқибатида икки киши ҳалок бўлиб, икки киши яраланган. Вазирнинг сўзларига кўра, ракета онкологик касалликка чалинган болалар диализ олаётган корпусга келиб тушган. Жонлантириш, жарроҳлик ва онкология бўлимлари шикастланган. Бинода харобаларни тозалаш ишлари олиб борилмоқда.

Россия ракетаси келиб урилган бинодаги беморлар шаҳардаги бошқа тиббиёт муассасаларига эвакуация қилинмоқда. Беш нафар бола қайта ётқизиш учун олиб кетилган, дея хабар берган шаҳар ҳарбий маъмурияти раҳбари Сергей Попко.

Украина президенти офиси раҳбарининг коммуникация масалалари бўйича маслаҳатчиси Даря Заривна Киевдаги шифохона ўққа тутилиши оқибатида жабрланган болалардан бири акс этган фотосуратни эълон қилган.

РФ қўшини болалар шифохонасига «мақсадли» зарба берди, деган Украина президенти офиси раҳбари Андрей Ермак. «Бу зарба тинч аҳоли устига йўлланди, инфратузилмалар бўйлаб зарба берилди, бутун дунё бугунги террор оқибатларини кўриши, бунга фақат куч билан жавоб қилиниши керак», — деган Ермак.

Украина президенти Володимир Зеленский шифохона харобалари остида одамлар қолиб кетгани, ҳозирча қурбонлар ва яраланганларнинг аниқ сони маълум эмаслигини айтган. «Ҳозирда барча харобаларни тозалашга ёрдам бермоқда: шифокорлар, оддий одамлар», — деган Украина президенти.

Россия ўз ракеталари қаерга учаётганини билмаслиги мумкин эмас ва ўзининг барча жиноятлари учун тўлиқ жавоб бериши керак: одамларга қарши, болаларга қарши, умуман бутун инсониятга қарши жиноятлари учун. Ҳозирда ҳар бир киши Россия қанақалиги ва у нималар қилаётганини кўриши учун  дунё бу ҳақда жим турмаслиги жуда муҳим.

Украинанинг бошқа шаҳарлари ҳам зарба остида қолган. Днипропетровск областининг Днипро ва Кривий Риҳ, Херсон областининг Скадовск, Донецк областининг Краматорск шаҳарлари шулар жумласидан. Украин нашрлари Краматорскда Новокраматорск машинсозлик заводи ўққа тутилгани ҳақида ёзган.

Кривий Риҳда ёпирилма зарбалар оқибатида 10 киши ҳалок бўлган, 31 киши жароҳатланган, деб хабар беради Кривий Риҳ мудофаа кенгаши раҳбари Олександр Вилкул. «Бир неча зарба келиб тушди. Жумладан — саноат корхонасининг маъмурий биносига. Оқибатларни бартараф этиш ишлари давом эттирилмоқда», — дея хабар қилган у.

Днипро ўққа тутилиши оқибатида кўп қаватли уй, корхона ва техник хизмат кўрсатиш станцияси шикастланган, деб хабар берган Днипропетровск области ҳарбий маъмурияти раҳбари Сергей Лисак. Унинг сўзларига кўра яраланганлар бор. Уларнинг сонига аниқлик киритилмаган.

Донецк области Покровск шаҳрида уч киши ҳалок бўлди, дея хабар қилган регион ҳарбий маъмурияти раҳбари Вадим Филашкин. Унинг сўзларига кўра, ёпирилма ракета ҳужуми вақтида шаҳардаги корхоналардан бирига зарба келиб тушган. «Айнан унинг ҳудудида уч киши ҳалок бўлган», — дея хабар қилади Филашкин. У Донецк областидаги бошқа обшиналар ҳам ҳужумга учрагани, ҳозирча бу ҳудудлардаги талафот ҳақида маълумотлар келиб тушмаганини қўшимча қилган.

Россия қўшини Украина бўйлаб 40 дан ортиқ ракета учирган, дея аниқлик киритади Украина президенти Володимир Зеленский. «Россиялик террорчилар яна Украинага ракеталар зарбаси йўллади. Турли шаҳарларда: Киев, Днипро, Кривий Риҳ, Словянск, Краматорск. Турли типдаги 40 дан ортиқ ракета билан. Турар жойлар, инфратузилмалар ва болалар шифохонаси шикастланган. Имкон қадар кўпроқ одамни қутқариб қолиш учун барча хизматлар ҳаракатга келтирилган. Ва бутун дунё Россия зарбаларига ниҳоят барҳам бериш учун бор кучини ишга солиши лозим. Қотиллик — бу Путин келтирадиган нарса. Биз фақат биргаликда ҳақиқий тинчлик ва хавфсизлик келтиришимиз мумкин», — деган Зеленский.

РФ мудофаа вазирлиги Киевдаги вайронгарчилик «украинларнинг ҳаво ҳужумидан мудофаа ракетаси қулаши оқибатида» содир бўлганини маълум қилди. РФ мудофаа вазирлиги Россия армияси 8 июл тонгида «Киев режимининг Россия энергетика ва иқтисодий объектларига зарар  етказишга уринишларига жавобан» Украина ҳарбий саноати объектлари ҳамда Украина қуролли кучларининг авиация базалари бўйлаб гуруҳли зарбалар йўллаганини маълум қилди, дея ёзади «Интерфакс». «Зарба мақсадларига эришилди. Белгиланган объектларга аниқ зарба берилди», — дейилади идора хабарида. Вазирлик фуқаролик объектлари бўйлаб ҳужум қилганини рад этган.

«Киевдан келаётган кўп сонли фото ва видеокадрлар украинларнинг шаҳар чеккасидаги зенит-ракета комплексидан учирилган ракетаси қулаши оқибатида вайронгарчиликлар юзага келганини тасдиқлайди. Киев режимининг бу каби истерикаси ҳар йили ва ҳар сафар НАТОдаги ҳомийларининг учрашуви (саммит) арафасида содир бўлади. Бундай провокациялардан мақсад — келгусида ҳам Киев режимини молиялаштиришни ва урушни сўнгги украин қолгунича давом эттиришни таъминлаш», — дея қўшимча қилади вазирлик.