Италияда Bayesian суперяхтаси торнадо оқибатида чўкиб кетди

Италия жанубидаги Палермо қирғоқларига ёпирилган торнадо натижасида Bayesian суперяхтаси ҳалокатга учради. Ҳодиса оқибатида бир киши ҳалок бўлди ва яна олти киши бедарак йўқолди, деб хабар беради Sky News.

Қайд этилишича, ҳалокатга учраган суперяхтадан 15 киши қутқариб олинган — улар орасида кема командири ҳамда бир ёшли қиз ва унинг онаси ҳам бор.

Дастлаб Портичелло портидаги причалга боғланган кема 18 август куни денгизга сузиб кетган ва соҳил яқинига лангарни ташлаган. Британия байроғи остида сузган яхтада Янги Зеландия, Шри-Ланка, Буюк Британия, Франция ва Ирландия фуқаролари бўлган. Яхтага эгалик қилган Camper & Nicholsons компаниясининг аниқлик киритишича, кема бортида 12 нафар меҳмон ҳамда 10 нафар экипаж аъзоси билан сузиб кетган.

Bayesian яхтаси — Perini Navi компанияси томонидан қурилган ва 2008 йилда ўз эгасига топширилган. Кеманинг узунлиги 56 метрни ташкил этиб, у олтита люкс каютага 12 нафар меҳмонни сиғдира олади. Шунингдек, 10 нафаргача экипаж аъзоси хизмат кўрсатади.

Bayesian узунлиги бўйича дунёда иккинчи ўринда турадиган ва алюминийдан ясалган энг катта мачтага эга. Кема 8 цилиндрли двигатель ёрдамида ҳаракатланади, тезлиги эса 15 узелга қадар ета олади.

Кучли шамол оқибатида яхта чўкиб кетган. Нидерландиянинг Sir Robert номли елканли кемаси экипажи томонидан 15 киши қутқарилган. Ҳалок бўлган шахснинг жинси ва фуқаролиги ҳозирча ошкор этилмаяпти. Торнадо оқибатида Палермо соҳилидаги ҳудудлар, жумладан, маҳаллий портдаги қайиқларга ҳам шикаст етган.

Италия соҳил хавфсизлиги хизмати ходимлари бедарак йўқолганларни қидириш билан шуғулланмоқда. Операцияларга жалб этилган ғаввослар яхта чўккан жойда 57 метр чуқурликка қадар шўнғиган. ANSA агентлигининг ёзишича, бедарак йўқолганлар каюталарида бўлган ва у ерга қамалиб қолган бўлиши мумкин.