Ҳосеп Гвардиола Родрининг жароҳатидан кейин ечим ўйлаб топиши шарт эканини айтди, лекин «Сити» мавсум бошидаги бир неча ўйинда ҳам испаниялик футболчига дам берганди. Лекин ҳозир тажриба учун бошқа икки фигура — жароҳатланган Де Брейне ҳамда Евро-2024 турниридаги иштирокидан кейин формасини тиклашда давом этаётган Фоден етишмаяпти. Қолаверса, Гундўған «Этиҳад»га қайтганидан кейин ҳали олдинги даражасига чиқмади.
Лекин бу муаммолар Нюкаслда ўтган ўйинда жамоага биринчи рақам остида ҳаракатланишга халал бермади. «Қарғалар» фаолроқ бошлаганди, аммо Грилишнинг пасидан кейин Гвардиол рақиб жарима майдони ичига юриш уюштириб, ҳисобни очди. Фақат иккинчи бўлим бошида амалдаги чемпионлар ўйинни сусайтиришди ва Гордонни олдинга ўтказиб юборишди. Эдерсон уни қўполлик билан тўхтатишга мажбур бўлди ва «Нюкасл» вингери ўтган мавсум бошидан буён еттинчи бор 11 метрлик жарима зарбасини ишлаб, уни ўзи голга айлантирди.
Ўйиннинг қолган қисмида ҳам «Сити» мезбонларни жарима майдонига қамашда давом этди, аммо Поуп деворидан ўтиб бўлмади, унинг Бернарду Силванинг зарбасидан кейин амалга оширган сейви — тур безагига айланди.
Ҳоланд АПЛнинг бу мавсумида илк бор майдонни голсиз тарк этди (6-турга келиб). У биринчи бўлимда Бёрн оёғига берган зарбадан кейин ўйинни бироз оқсоқланиб давом эттирди. Ҳужумчи ўйин давомида беш бор зарба берди, лекин улардан бирортасини чинакамига хавфли деб бўлмайди.
Бу турда «Арсенал» ҳам очко йўқотиши мумкин эди, жамоа Эдегор сафдан чиққанини оғриқли ўтказмоқда. Лекин бу сафарги вазиятни норвегияликнинг йўқлиги билан оқлаб бўлмасди. «Канонирлар» танаффусга 2:0 ҳисобидаги устунлик билан йўл олишди ва барчаси назорат остидадек кўринаётганди. Аммо иккинчи бўлим бошида жарима зарбаси ижро этилганида Жастин ҳисобни қисқартирди (тўп Ҳаверц орқали рикошет бўлиб дарвоза тўрига бориб тушди), кейин эса ўнг қанотда ёлғиз қолдирилганида ҳаводаги тўпга чиройли зарба бериб, мувозанатни тиклади.
Ўйин охири эса — титул учун курашишда зарур бўлган характер ва табиийки савияни намойиш этиш бўйича дарслик бўлди. Барча Микел Артета жамоаси бурчак зарбаларини қанчалик хавфли ижро этишидан хабардор, аммо бу ҳеч кимни қутқариб қололмайди. Асосий эътибор ҳаводаги курашлар қироли Габриэл Магалянсни тўхтатиш учун қаратилганида бошқа қаҳрамон топилади. Бу сафар — кичик бўйли Троссар. Бу ҳолатда тўп Ндидининг оёғи орқали рикошет бўлиб дарвозага бориши ҳам ёрдам берди, аммо омад кучлиларга кулиб боқади. Бу вазиятда автогол ёзилди. Ғалаба қозонилганида бунинг аҳамияти йўқ, аммо бу Сакани стартдаги қаторасига олти ўйинда голли узатма берган футболчи сифатида АПЛ рекордини ўрнатишдан маҳрум этди.
«Стэмфорд Бриж»да кечган параллел учрашувда ҳам 4:2 ҳисоби қайд этилди, аммо у ерда ҳеч қандай драма рўй бермади. Меҳмонлар тезда ҳисобни очишган бўлса-да, Палмер биринчи бўлимдаёқ ўйин тақдирини ҳал қилди.
Моҳиятан унинг карераси энди бошланмоқда, у эса тарихга кириб бўлди. «Манчестер Сити» тарбияланувчиси бўлган яримҳимоячи «Челси» сафида 39 ўйин ўтказди ва аллақачон ҳет-триклар сони (3) бўйича Диде Дрогба, Фрэнк Лэмпард ва Жимми-Флойд Ҳасселбайнк каби ўтмиш юлдузлари билан тенглашиб олди. Клуб рекорди у қадар катта натижа эмаслиги тушунарли. Лекин Палмер АПЛ рекордини ҳам ўрнатди — биринчи бўлимда тўрт гол урган футболчи сифатида.
21-дақиқада Жексон «Брайтон» дарвозабони билан яккама-якка вазиятга чиқиб борди, аммо тўпни ўзи тепмасдан, Палмерга пас узатди, у эса жарима майдони чизиғидан аниқ зарба йўллади.
28-дақиқада Палмер Санчога ишлатилган фол учун белгиланган пеналтини аниқ ижро этди.
31-дақиқада Палмер жарима зарбасини аниқ ижро этиб, 30 метр масофадан яқин тўққизликни нишонга олди.
41-дақиқада у яна яқин бурчакка зарба йўллади, бу сафар ўйиндан.
Палмер пента-трикка эришиши ҳам мумкин эди, аммо яна бир эпизодда унинг зарбасидан кейин тўп устунга тегди. Энди англиялик футболчи АПЛнинг олти туридан кейин урган голлари сонини олтитага етказди. У «гол+пас» тизимида Ҳоландга етиб олди (норвегиялик ҳужумчи 10 гол урган, ассист йўқ).
Хосеп Гвардиола ўтган йил ёзида уни қўйиб юборганига афсусланаётгани аниқ. Манчестернинг қизил қисмида эса — «МЮ» мухлислари Эрик тен Ҳаг билан келиша олмасдан, бошқа жамоага ўтиб кетган Санчони соғинмоқда. Англиялик вингер янги жамоасида учта голли пас бериб улгурди. Бу «қизил иблислар» сафидаги Бруну Фернандеш, Гарначо, Рэшфорд ва Эриксен каби футболчиларнинг бу мавсумдаги жами голли узатмалари сонидан кўп.
«Челси» эса биринчи бўлимнинг ўзида икки бор гол ўтказиб юборган бўлса-да, ғалабани сақлаб қолди ва 13 очко билан кучли тўртликда жойлашган.
АПЛда топ-клублар ёки ушбу клубларнинг футболчилари томонидан ўрнатилаётган турли рекордлар мухлисларни зериктираётган бўлиши мумкин. Аммо бу сафар анча камтарона «Брентфорд» футболчилари ноёб натижа қайд этишди.
Сентябр ойида миллий жамоалар ўйинлари учун юзага келган танаффусдан кейинги турларда ушбу жамоа барқарорлик кўрсатмоқда. Фақат очколар жамғаришда эмас, голлар учун тайминг бўйича. 14 сентябр куни «Брентфорд» «Манчестер Сити» билан ўйиннинг 23-сониясида ҳисобни очди — ҳужумчи Йоан Висса дарвозани ишғол этди. 21 сентябрда бу жамоа «Тоттенҳэм» дарвозабонини ранжитди, 24-сонияда Брайан Мбемо гол урди, 28 сентябрда эса — «Вест Ҳэм» ҳам ушбу ҳужумчидан 37-сониядаёқ тезкор гол ўтказиб юборди.
«Брентфорд» — АПЛ тарихида қаторасига уч ўйиннинг илк дақиқасида гол урган биринчи клуб. Бундай серия профессионал даражада ҳеч бир жамоа билан кузатилмаган. Фақат бир нюанс бор. Илк дақиқалардаги голлар «Брентфорд»ни «Манчестер Сити» (1:2) билан ўйинда ҳам, «Тоттенҳэм» билан ўйинда ҳам (1:2) қутқара олмаган. Икки ҳолатда ҳам биринчи бўлимлардаёқ иккита гол ўтказиб юборилган. «Вест Ҳэм» устидан ҳам ғалаба қозонилмади (1:1). Жамоа тарихга кирди, аммо бу уч ўйинда фақат бир очко олди.
Мбемо эса жорий мавсумдаги голлари сонини бештага етказиб олди. «Брентфорд» кейинги турни 5 октябр куни уйда, «Вулверҳэмптон»га қарши ўтказади. Бундай статистикага эга жамоага қарши майдонга чиқиш ҳар қандай рақиб учун қўрқинчли. Афтидан, энди бу жамоага қарши ўйинлардаги биринчи галдаги вазифа — илк дақиқаларда гол ўтказиб юбормаслик бўлади.
Лигада куннинг охирги ўйини нисбатан оддий кечди. Статистикага кўра ҳам «Ливерпул» — «Вулверҳэмптон» учун энг ноқулай рақиб эди. «Бўрилар» қизилларга 17-бор ютқазди, Жонстон эса Собослаининг яқин масофадан йўллаган зарбасини қайтариб, муқаррар мағлубиятни бироз ортга сурди. Биринчи бўлимга қўшиб берилган дақиқаларда Диогу Жотанинг узатмасидан кейин Конате ҳисобни очди.
Лекин гол муаллифи иккинчи бўлим бошида интригага сабаб бўлди. Француз ҳимоячи ёки тўп майдонни тарк этди деб ҳисоблади, ёки Алиссонга ишониб қолди. Нима бўлганда ҳам Странд-Ларсен охиригача давом этди ва Аит-Нурини голли пас билан таъминлади. Лекин интрига узоққа чўзилмади ва Салоҳ 2021 йилдан буён илк бор қаторасига учинчи сафар ўйинида гол урди. Бу сафар мисрлик ҳужумчи Жота ишлаган пеналтини аниқ ижро этди ва Арне Слот жамоасини биринчи ўринга олиб чиқди.
Ҳанси Флик клуб рекорди томон кетаётганди, «Барселона» қаторасига беш ўйинда ютган жамоаси майдонида мавсумдаги қаторасига саккизинчи ғалаба кутилганди. Аммо каталонияликлар мураббийига тиғиз тақвим халал берди, сешанба куни Чемпионлар лигасида ўйнаш керак, шунинг учун ҳужум чизиғида Левандовскига шерик сифатида одатдаги Ямал ҳамда Рафиня ўрнига, Ферран Торрес ва бошланғич таркибдан илк бор ўрин олган Пау Виктор туширилди.
Иккинчи жамоадан жалб этилган вингер «Вилярреал» билан ўйинда голли пас берганди, бу ўйинда эса «Осасуна» дарвозабонини пас беришдаги хатоси учун жазолади. Аммо бу вақтга келиб «Барса» ҳимоячилари икки гол ўтказиб юборишганди. Памплоналиклар «Бавария»дан ижарага олган Сарагоса аввалига жамоанинг хорватиялик мергани Будимирни голли пас билан таъминлади, кейин эса ўзи Иняки Пеня билан дуэлда устун келди.
«Барса» дастлабки 45 дақиқаликда ўзи учун шармандали 0,05 xG қайд этишди. Бу 2011 йилдан буён энг ёмон кўрсаткич. Ҳисоб 2:1 кўринишида эканида майдонга туширилган Ямал ва Рафиня ҳам ўйинни ўзгартира олмади. Аксинча, Будимир ёш Серхи Домингеснинг фолидан кейин белгиланган пеналтини аниқ ижро этиб, ҳисобдаги фарқни яна иккитага етказди. Ямал ўйин охирида «тўққизлик»ни аниқ нишонга олди, аммо бу вақтга келиб «Осасуна» тўртинчи голини уриб улгурганди. Бу мағлубиятдан кейин ҳам «Барса» ҳамон турнир жадвалида яккапешқадам бўлиб қолмоқда, якшанба куни бўлиб ўтадиган Мадрид дербисида ғалаба қозонган жамоа уларга фақат яқинлашиб олиши мумкин.
Италиянинг амалдаги чемпионлари мавсум стартида кутилмаганда сафар ўйинларини муваффақиятсиз ўтказди. Аввалига «Интер» «Женоа» билан ўйиннинг қўшимча дақиқаларида устунликни бой берди (2:2), кейин эса «Монца» билан ўйинда охирги дақиқаларда мағлубиятдан қутулиб қолди (1:1). Лекин энди бу комплексга барҳам берилган, «нерадзуррилар» ғалаба учун келганини 1-дақиқадаёқ намойиш этишди, Дармиан ажойиб пас билан Фраттезини яккама-якка вазиятга чиқариб юборди. Аммо асосийси — ниҳоят жамоа сардори ва энг яхши ҳужумчиси Лаутаро Мартинес гол уришни бошлагани бўлди. Аргентиналик футболчи биринчи бўлим охирида Димарконинг қанотдан узатмасига оёқ қўйиш орқали голсиз сериясига барҳам берди. Иккинчи бўлим бошида — яқин масофадан туриб тўпни дарвоза бурчагига йўллади. Бу ҳужумда асосий ишни тўп учун охиригача курашган Тюрам бажарди, у ўтган мавсум охиридан буён Лаутарога бешинчи бор ассистентлик қилмоқда. Бу А серияда ҳужумдаги тандемлар учун энг яхши натижа.
Тиагу Мотта эффекти. «Ювентус» — чемпионат пешқадами. Лекин якшанба кунги ўйинда туринликларнинг ҳамшаҳарларига қарши ўйнайдиган «Наполи» олдинга чиқиб кетиши мумкин. Аммо нима бўлганда ҳам «Кекса синиоралар» мухлислари хурсандчилик қилиши мумкин. Биринчидан, улар анчадан буён ўз севимлиларини турнир жадвалининг энг юқорисида кўришмаганди. Иккинчидан, «Юве» — топ-5 лигаларда бу мавсумда ҳали гол ўтказмаган ягона жамоа бўлиб қолмоқда.
Жамоа олти турда ўз дарвозаси дахлсизлигини сақлаб қолди ва бу А Серия рекорди! Жамоа мудофаасида барчаси жойида. Ҳужумда ҳам. Влаҳович мавсумда иккинчи бор дубл қайд этди ва лигада ҳали ҳеч ким бундай натижага бу қадар қисқа муддатда эришмаганди. Сербиялик ҳужумчига Копмайнерс ассистентлик қилди, у янги жамоасига жуда тез мослашиб кетди. Учинчи голни эса жамоанинг бошқа янги футболчилари – захирадан тушган Ҳефрен Тюрам ва Франсишку Консейсау уюштиришди.
Ўтган мавсумдан эътиборан «Бавария»нинг «Байер» билан учрашувлари долзарблиги борасида мюнхенликларнинг дортмундликларга қарши немис класикасидан ўтиб кетмоқда. Навбатдаги тўқнашув ўта ҳужумкор леверкузенликлар зарурат туғилганида прагматик ўйин кўрсатиши ва атиги учта зарба билан ҳам очко олиши мумкинлигини кўрсатди. Гол учун эса биргина бурчак зарбаси ижро этилиши етарли бўлди (амалдаги чемпионлар стандарт вазиятдан еттинчи бор гол уришди), бу вазиятда мюнхенликлар жарима майдони ичида Чакани бўш қолдиришди, у эса тўпни қулай вазиятдаги Андриҳга ташлаб берди. Унинг зарбасидан кейин Нойерда деярли имкон йўқ эди, кўп ўтмай майдоннинг иккинчи томонидаги дарвозани қўриқлаган Градецки эса у қадар мураккаб бўлмаган ҳолатда жамоасини қутқара олмади, у Павловичнинг узоқдан йўллаган зарбасини ўтказиб юборди.
Бошқа томондан, финлар посбони баварияликларнинг янги юлдузи Олисега икки метрдан гол уришга йўл қўймади. Бундан ташқари, Лукаш Гнабри тўпга ҳаводалигида зарба йўллаганида омад Лукашга кулиб боқди, дастлабки зарба устунга, иккинчиси тўсинга тегди. «Бавария» ғалабага яқинроқ эди, дурангдан кейин ҳам пешқадамликни сақлаб қолди, аммо натижага рози бўлмагани аниқ. Қолаверса, ўйин охирида Кейн чўлоқланганча майдонни тарк этди, у уч йилдан буён илк бор дарвоза соҳасига аниқ зарба беролмади. «Байер» таркибида ҳам жиддий йўқотиш бор, Грималдо ўйинни охиригача давом эттира олмади. Дастлабки баҳоларга кўра, Кейн енгил шикастланган, аммо якшанба куни англиялик ҳужумчи тўлиқ текширувдан ўтказилади.
«Байер» устидан қозонилган ёрқин ғалабадан кейин Лейпциг жамоасининг натижалари пасая бошлаганди. «Ҳўкизлар» жамоаси Чемпионлар лигасида «Атлетико»га аламли тарзда мағлубиятга учради, бундеслигада эса «Унион» ва «Санкт-Паули» каби кучсизроқ рақиблар билан ўйинларда голсиз дуранглар қайд этилди. Жамоа футболчилари бор аламини «Аугсбург»дан олишди. Шешко эса тўрт дақиқа ичида узоқ масофадан ҳам, яқиндан ҳам дарвоза тўрини ишғол этди. Словениялик ҳужумчи тўртинчи гол муаллифи Симонсга ассистентлик ҳам қилди, иккинчи бўлим бошида учинчи голни урган Опендани эса Симонс тўп билан таъминлаганди. Марко Розе шогирдларининг сўнгги бир ой ичидаги илк ғалабаси ўта ишончли бўлди.
Кун статистикаси
Ҳужумчи Антонио «Вест Ҳэм»нинг АПЛда гол+пас тизимида 100 очко жамғарган (67+33) 1-футболчиси бўлди.
«Фулҳэм» ҳужумчиси Раул Ҳименес АПЛда Ҳавиер Эрнандесдан кейин 50 гол урган 2-мексикалик бўлди.
«Брентфорд» қаторасига 3-турда 1-дақиқадаёқ ҳисобни очиб, Англия рекордини ўрнатди.
«Лилл» ҳужумчиси Дэвид йил бошидан буён 26 гол уришга улгурди. Шанба куни «Гавр» билан ўйинда ҳет-трик қайд этган канадалик топ-5 лигаларда фақат Ҳоланд ва Мбаппедан (ҳар иккиси 29 тадан гол урган) ортда қолмоқда.
«Нюкасл» 32 ўйиндирки «Манчестер Сити»га қарши баҳсларда дарвозаси дахлсизлигини сақлай олмаяпти. Бу АПЛда икки жамоа қарама-қаршиликларидаги рекорд серия.
«Реал Сосиедад» яримҳимоячиси Кубо ла лигада 167-ўйинини ўтказиб, япон футболчилари учун турнир рекордини ўрнатди.
