Сирдарёда ногирон боланинг онасидан тиббий хулоса учун пул олган шифокорга ҳукм ўқилди 

Сирдарё вилоятидаги кўп тармоқли марказий поликлиника врачи ногирон боланинг онасидан тиббий хулоса учун пул олаётганда ушланган. Бу ҳақда ЎзА хабар бермоқда. 

Маълум қилинишича, психионевролог шифокори Н. ўзи даволаётган ногирон боланинг соғлиғи бўйича тиббий хулосани Асаб ва руҳий касалликлар диспансери комиссиясидаги танишлари орқали тўғрилаб беришни айтиб, унинг онасидан бир млн сўм олаётганда ҳуқуқ-тартибот органлари томонидан қўлга олинган. 

Дастлабки суриштирувда у бу қилмишини бемор боланинг онасига ёрдам сифатида қилганини айтган. Шифокорнинг бу қилмиши жиноят сифатида баҳоланиб, жиноят ишлари бўйича Янгиер шаҳар судида кўриб чиқилган. 

Судда бемор боланинг онаси шифокор ўз ваколати дорисида доимий равишда унга ёрдам кўрсатганини, лекин бу сафар ундан пул сўраганини, ўғлининг дори-дармонлари учун пул тополмай турганини айтса-да, у аввал пулни олиб келсанг, кейин ишни битириб бераман, деганини айтган. 

Шифокор бу иши жиноят эканини тушуниб, суд мажлисида қилган ишидан пушаймонлигини билдирган. 

Қайд этилишича, суд Жиноят кодексининг тегишли моддалари билан айбдор деб топилган шифокорни соғлиқни сақлаш тизимида ҳамда мансабдор ва моддий жавобгарлик вазифаларида ишлаш ҳуқуқидан маҳрум қилган. 

Шунингдек, унга БҲМнинг 55 баробари (1 октябрдан 20 625 000 сўм бўлади) миқдорида жарима ҳамда 2 йил-у 6 ой 10 кун муддатига озодликдан чеклаш жазоси тайинланган.