Тошкентнинг Тарас Шевченко кўчасида анчадан бери қурилиш ишлари олиб борилаётганди. Илк гастрономик аллеянинг бир қисмида таъмирлаш ишлари якунланиб, аҳолига фойдаланишга топширилди.
Миробод тумани ҳокимлигининг маълумот беришича, гастрономик кўча бўйлаб фото-зоналар ва яшил ҳудудлар барпо этилган, 39 та кичик ва 17 та катта торшерлар ўрнатилган, 1 та автобус бекати қурилган, 39 та видеокузатув камералари ва юзни таниш тизимлари, 20 та ўриндиқ ва ахлат қутилари ўрнатилган ҳамда Wi-Fi тарқатиш тизимлари монтаж қилинган.
Шунингдек, одамларга қулайлик яратиш мақсадида қарийб 3 минг кв.м узунликда пиёдалар йўли барпо этилган, қатнов йўлининг асосий қисми (2600 кв.м) эса табиий гранит тошдан терилган.
Қолаверса, кўча бўйлаб турли маиший хизмат кўрсатувчи шохобчалар ташкил қилинган. Улар қаторида аҳоли орасида жуда машҳур емакхоналар ҳамда кийим-кечак дўконлари ҳам бор.
