Тошкентда ногиронлиги бўлганлар учун “Ижтимоий такси” хизмати йўлга қўйилди

Ушбу лойиҳа аҳолининг ижтимоий ҳимояга муҳтож қатламларини қўллаб-қувватлаш, жумладан, ногиронлиги бўлган шахслар ва таянч ҳаракатида муаммолари бўлган болалар учун ижтимоий соҳа объектлари, таълим муассасаларига бориб келишига қулайликлар яратиш мақсадида йўлга қўйилди.

Хизматдан фойдаланиш Yandex Go иловаси орқали амалга оширилади. Иловада ногиронлиги бўлган шахсларнинг эҳтиёжларига мослаштирилган махсус функция бор. Улар манзилга етиб олиш учун “Старт”, “Комфорт” ёки “Комфорт+” тарифларидан бирини танлаши мумкин ва барча тарифларда хизмат нархлари ўзгармайди.

Буюртмани қабул қилган ҳайдовчига мижозни манзилга олиб бориш давомида қуйидаги махсус вазифаларни амалга ошириш кераклиги ҳақида хабар берилади, масалан:

• манзил карточкасида фойдаланувчига машинани топиш, унинг ёнига келиш ва салонга ўтиришга ёрдам берувчи изоҳ кўринади;
• эшитишида муаммолари бўлган шахсларга ҳайдовчи чат орқали мулоқот қилишни сўраши керак бўлади;
• “ногиронлик аравачасидаман” бу функция танланган бўлса, ҳайдовчида “ногиронлар аравачасида бўламан, машинага ўтиришда ёрдам, бўш юкхона керак” изоҳи кўринади.