АҚШ Хитойдан олиб келинадиган дронларни бутунлай тақиқлаш имкониятини кўриб чиқмоқда

АҚШнинг амалдаги президенти Жо Байден администрацияси мамлакатда Хитой учувчисиз учиш аппаратларини чеклаш ёки тақиқлаш имкониятини кўриб чиқмоқда, деб хабар беради Bloomberg.

АҚШ Савдо вазирлиги компаниялардан эҳтимолий тақиқ оқибатлари тўғрисида маълумот олиш истагини билдирди, ариза беришнинг охирги муддати — 4 март.

Бу охир-оқибат якуний қарор 20 январ куни АҚШ президенти лавозимида иш бошлайдиган Доналд Трамп администрацияси томонидан қабул қилинишини англатади.

«Учувчисиз авиация тизимлари технологиясини етказиб бериш занжири хавфсизлигини таъминлаш миллий хавфсизлигимиз учун муҳим аҳамиятга эга», — дейди савдо вазири Жина Раймондо. Унинг айтишича, ушбу чоралар «Қўшма Штатлар ҳимоясида муҳим қадам» ҳисобланади.

2024 йил декабрда агентлик ўз манбаларига таяниб Хитой ишлаб чиқарувчилари АҚШ ва Европага дронлар ишлаб чиқаришда ишлатиладиган муҳим деталлар экспортини чеклашни бошлагани ҳақида ёзганди. Ушбу дронлар Украина мудофаасида муҳим аҳамият касб этади.

Ўшанда Bloomberg агентлиги манбаси дронлар учун эҳтиёт қисмларнинг етказиб берилишига қўйилган чекловлар ҳам Америка, ҳам Европа компанияларига таъсир кўрсатганини таъкидлаганди. Хитойнинг двигател, аккумулятор ва учиш контроллерларини ишлаб чиқарувчилари етказиб беришлар ҳажмини қисқартирган ёки бутунлай тўхтатган.

АҚШда бир неча бор номаълум учувчисиз учиш аппаратлари аниқланган эди. 2024 йилда дронлар тўғрисидаги масала Конгресс вакиллари эътиборига ҳам тушган. У ердагилар Шэнжэнда жойлашган иккита компания — Da Jiang Innovations (DJI) ва Autel Robotics дунёдаги учувчисиз учиш аппаратлари бозорининг қарийб 90 фоизини назорат қилишини айтган эди.

Сирли дронлар ҳақидаги хабарлардан кейин ФҚБ, Пентагон ва Ички хавфсизлик вазирлиги уларни тутиш учун илғор радиолокацион тизимларини ишга туширди. Оқ уй Миллий хавфсизлик кенгашининг стратегик алоқалар бўйича координатори Жон Кирбининг сўзларига кўра, келиб тушган бу каби 5 мингдан зиёд хабарлардан фақат 100 таси қўшимча ўрганишларни талаб қилган. Унинг айтишича, қайд этилган ҳолатларнинг аксарияти — «тижорий дронлар, ҳаваскорлик учувчисиз учиш аппаратлари ва ҳуқуқ-тартибот органлари дронлари, шунингдек, бошқарилувчи самолёт, вертолёт ва ҳатто хатолик туфайли дрон дея қабул қилинган юлдузлар комбинациясидир».