AP: Байден АҚШда TikTok’ни блоклашга оид қарорни Трамп администрациясига қолдиради

АҚШнинг амалдаги президенти Жо Байден мамлакатда TikTokʼни блокировга қилишга оид чораларни жорий этмайди. Бу ҳақда Associated Press нашри америкалик амалдорга таяниб хабар берди.

Байден администрацияси ижтимоий тармоқни блокировга қилиш қарорини Трампнинг бўлажак администрациясига қолдиради.

АҚШ Конгресси миллий хавфсизликка таҳдид уйғотиши мумкинлиги сабаб TikTokʼни блоклашга оид қонун лойиҳасини 2024 йил апрелда қабул қилганди. Ўша ойнинг ўзида Жо Байден қонунни имзолаган. Сервисга эгалик қилувчи ByteDance компаниясига уни америкаликларга сотиши учун 270 кун муҳлат берилган. Ушбу муддат 19 январда — Доналд Трампнинг инаугурациясидан бир кун олдин тугайди.

Трампнинг миллий хавфсизлик бўйича маслаҳатчиси Майк Уолц 16 январ куни TikTokʼни блоклаш тўғрисидаги қонун битим амалга ошмагунга қадар сервис фаолиятини узайтириш «имконини беришини» маълум қилди.

Сенатдаги демократлар 16 январ куни ижтимоий тармоқни сотиш учун белгиланган муддатни узайтиришга оид қонунни қабул қилишга уринди, аммо у республикачи сенатор Том Каттон томонидан блокланди.

The Wall Street Journal хабарига кўра, TikTok эгаси ByteDance 2024 йилнинг тўртинчи чорагида ўзини тахминан 300 миллиард АҚШ долларига баҳолаган. Шу тариқа у дунёдаги энг қиммат хусусий компаниялардан бири бўлиб қолмоқда.

Аввалроқ йирик лойиҳалар ва хайрия тадбирлари билан танилган америкалик машҳур блогер MrBeast TikTok’ни сотиб олиши мумкинлиги тўғрисида хабар берилганди. Шу тариқа блогер TikTok’ни АҚШда блокланишдан “қутқармоқчи”. “Майли, TikTok’ни блокламасликлари учун уни сотиб оламан”, — дея ҳазил аралаш твит ёзган MrBeast X ижтимоий тармоғидаги саҳифасида.