“Учинчи шахслар аралашуви” – миллионлаб ўзбекистонликлар Англияда ишлаш учун ариза топширган танлов бекор қилинди

Лекин орадан уч кун ўтиб, 15 январ санасида агентлик Англияда мавсумий қишлоқ хўжалиги ишлари учун очилган рўйхатдан ўтиш натижалари Hops Labour Solutions томонидан бир ёқлама бекор қилинганини билдирди.

«Ушбу қарор Hops Labour Solutions томонидан қабул қилинган ва Миграция агентлигида уни ўзгартириш ваколати йўқ. Масала юзасидан савол ва эътирозларингиз бўлса HOPSʼнинг [email protected], [email protected] электрон почтасига рус ва инглиз тилларида мурожаат қилишингиз мумкин», — дейилади агентлик баёнотида.

Бўлиб ўтган ҳолат юзасидан Hops Labour Solutions ташкилоти ҳам баёнот берди. Англиялик рекрутрга кўра, ташкилотга рўйхатга олиш жараёнига учинчи шахсларнинг аралашуви ҳақидаги кўплаб ишончли хабарлар келгани учун жараён тўхтатилган.

«Ҳурматли аризачилар, 10 январ, жума куни рўйхатга олиш жараёнига учинчи шахсларнинг аралашуви ҳақидаги кўплаб ишончли хабарлар туфайли HOPS Ўзбекистонда бўлажак ишга қабул қилиш босқичини кейинга суришга мажбур. Бу – жума куни рўйхатдан ўтганлар учун катта умидсизлик бўлишини тушунсак-да, биз ишга қабул қилиш жараёнининг яхлитлиги ва шаффофлигини таъминлашга масъулмиз.

Агар сизда учинчи шахслар Буюк Британиянинг мавсумий ишчилар схемасида жой олиш учун пул ундиргани ҳақида далилларингиз бўлса ва сиз бизнинг давом этаётган терговимизга ёрдам беришни истасангиз, биз билан [email protected] почтаси орқали боғланишингизни тавсия қиламиз», — дейилади агентлик баёнотида. Шунингдек, HOPS умумий сўровларга жавоб бера олмаслигини ҳам маълум қилган.

17 январ куни АОКАда бўлиб ўтган матбуот анжуманида Миграция агентлиги расмийлари ушбу ҳолатга яна тўхталди. Агентлик директори ўринбосари Матлаб Қуроновга кўра, ушбу лойиҳада ишлаш учун 3 миллионга яқин ўзбекистонлик ариза топширган, натижада техник муаммолар юзага келган.

«Бу лойиҳа охирги 2 йил давомида агентлик ва Англиядаги иш берувчи ўртасида ташкиллаштирилган, ҳаммаси қонуний. Олдинги йилда ҳам кетишган, бу йилда эски хатолардан келиб чиққан ҳолда ёндашдик, лекин шу билан ҳам айрим муаммолар юзага келди. Асосий масала 4 соатлик вақтни 6 соатга чўздик, «кўпроқ қилиб қўйса бўлмасмиди», дейиляпти. Бир нарсани тушуниш керак, агентлик фақат иш берувчи бизга айтган шарт-шароитлар ва вақтни ташкиллаштириб берамиз. Шундан кейин иш берувчилар бизга якуний рўйхат бериб, шунча одам ўтди, шуларга виза расмийлаштиришда, юборишда кўмак беришни сўраса, таъминлаб берамиз.

Асосий муаммо нима бўлди? Олдинги йилда бир миллион атрофида фуқаро мурожаат қилган бўлса, бу йил кетмоқчи бўлганлар уч миллионга яқинлашди. Демак, биз ўтган йилги камчиликларни кўриб, ўз платформамизни мукаммаллаштирдик. Шунга қарамай, техник сабаблар туфайли кўп мурожаатлар қабул қилинмай қолди, шунда вақтни узайтирдик. Лекин талабларга биноан, бу ҳам олти соатдан чўзилмади.

Энди бу лойиҳани қайта эълон қилишга келишдик. Чунки биз тушолмадик, рўйхатдан ўтолмадик, деган фуқаролар мурожаатлари бўлган. Биз ҳаммага тенг имкониятлар таъминланиши учун платформани кенгайтириш устида ишлаяпмиз. Талаб кучайиб бораётгани сабабли техника ҳам баъзи вазиятларда жавоб бермаяпти, лекин яқин орада эълон қиладиган танловлар учун тайёргарлик кўряпмиз. Вақт ва имконият масалаларини яхшилаб, фуқароларга адолатли имкониятлар яратиб берамиз. Адолатсизлик бўлмаслиги учун биринчи танловдан ўтганларнинг ҳам натижаларини бекор қилдик, ҳаммага бошқатдан бирдек имконият берилади», – дейди Матлаб Қуронов.

Агентлик масъули Азимжон Ҳусановга кўра, Англияга ишга топширувчилар сони кўплигининг асосий сабаби, бу лойиҳада ҳеч қандай касб мутахассислиги ва инглиз тилини билиш бўйича талаблар йўқлигида. Шу сабабли, кўпчилик оилавий ҳам ариза топшириб қўяверган.

Миграция агентлиги директори ўринбосари Матлаб Қурбонов Ўзбекистон фуқароларига Англияга мавсумий иш ўринлари учун рўйхатдан ўтиш лойиҳаси кейинроқ бошқатдан очилишини маълум қилди.