Nikon компанияси микроскоп ёрдамида олинган энг таъсирчан тасвирларни саралайдиган танловини 52-марта ўтказди. Ғолиб ишлар одатда кўзимиз илғамайдиган деталлар орқали кундалик ҳаётга бошқача назар ташлаш имконини беради.
Биринчи ўрин Германиянинг Кёльн шаҳридаги талаба ва тажрибачи фотограф Оле Билфельдтга насиб этди. У пуркагичли принтернинг қоғозга сиёҳ тушириш жараёнини микроскоп орқали суратга олган.
Билфельдт бунинг учун ўзи махсус суратга олиш қурилмасини ясаган. Унинг Macrofying номли лойиҳаси ҳам оддий буюм ва жараёнларни микрофотография орқали кутилмаган томондан кўрсатишга бағишланган.
Фотографнинг айтишича, принтерда чоп этиш шунчалик тез ва кўп такрорланадики, одамлар унинг микроскопик даражада қандай кечиши ҳақида деярли ўйламайди. Камера эса шу одатий жараённинг кўзга кўринмас деталларини очиб беради.
Иккинчи ўринни Жон-Оливер Данн эгаллади. Унинг суратида танасига гул чанги ёпишган сакровчи ўргимчак — Salticus scenicus акс этган.
Учинчи ўрин Каэлин Вулф ва Рэйчел Фланнерининг сичқон миясидаги нейронлар акс этган ишига берилди.
Танловда юқори баҳоланган бошқа ишлар орасида ҳашаротлар, ўсимликлар, ҳужайралар ва ҳатто электр разряди таъсиридаги қалам грифели тасвирлари ҳам бор:
Ёнғоқ узунбурун қўнғизи — Curculio nucum. © Přemysl Orlík
