WSJ: Трамп президентликнинг дастлабки 100 кунида Хитойга боришни режалаштирмоқда

20 январ, душанба куни Доналд Трампнинг инаугурация маросими бўлиб ўтади. У 2017 йилда, биринчи президентлик муддати бошланганида ҳам Пекинга ташриф буюрганди.

Фото: AFP/Getty Images

АҚШнинг сайланган президенти Доналд Трамп ўз маслаҳатчиларига инаугурациясидан кейин Хитойга ташриф буюришни режалаштираётганини маълум қилди, деб хабар бермоқда The Wall Street Journal.

Вазиятдан хабардор манбаларнинг маълум қилишича, Трамп Хитойга ўз президентлигининг дастлабки 100 куни ичида боришга қизиқиш билдирган.

WSJ’нинг қайд этишича, ҳозирда сафар бўйича якуний қарор қабул қилинмаган.

Трамп 20 январ куни АҚШ президенти лавозимига киришади. Маросимда ХХР раиси ўринбосари Хан Чжэн ҳам иштирок этиши режалаштирилган.

17 январ куни Трамп ХХР раиси Си Жинпинг билан телефон орқали мулоқот қилганди. Суҳбат давомида Вашингтон ва Пекин яқин вақтлар ичида биргаликда «кўплаб муаммоларни ҳал этишга» келишиб олган.

Трамп охирги марта Пекинга 2017 йилда, биринчи президентлик муддати бошланган вақтда борган эди.