Нидерландияда музейдан намойишга қўйилган Руминия хазиналари ўғирлаб кетилди

Номаълум шахслар Нидерландиянинг Ассен шаҳрида жойлашган Дренте музейига бостириб кириб, Руминиянинг «Дакия! Олтин ва кумуш қироллиги» кўргазмасига тегишли қатор экспонатларни ўғирлаб кетди. Бу ҳақда Руминия Ташқи ишлар вазирлиги хабар берди.

Идора маълумотларига кўра, 25 январ куни музейда портлаш содир бўлган, тахминларга кўра, бу бинога кириш учун уюштирилган. Натижада, Дакия хазинасига тегишли артефактлар ўғирлаб кетилган.

«Дастлабки маълумотларга кўра, портлаш Руминияга тегишли Дакия хазинаси экспонатлари намойишга қўйилган музей биносига бостириб кириш мақсадида уюштирилган», — дейилади хабарда.

Полициянинг ҳисоблашича, жиноятчилар бир неча киши бўлган ва улар уюшқоқлик билан ҳаракат қилган. Ўғирланган буюмлар орасида деярли соф олтиндан ишланган дубулға ҳам бор. Шунингдек, учта олтин билагузук ҳам олиб кетилган.

Руминия ташқи ишлар вазири Эмил Хурезяну нидерландиялик ҳамкасби Каспар Велдкамп билан телефон орқали боғланиб, ўғирланган экспонатларнинг маданий-тарихий аҳамияти нақадар улкан эканини таъкидлаган ва Руминия содир бўлган воқеадан ташвишда эканини билдирган.

Нидерландия ҳуқуқ-тартибот органлари ёрдам сўраб Интерполга мурожаат қилган. Айни вақтда ҳолат юзасидан тергов олиб борилиб, қолган экспонатлар инвентаризациядан ўтказилмоқда.