Испаниялик дипломат конференция вақтида мудраб ўтиргани учун ишдан бўшатилди

Испания ташқи ишлар вазири мамлакатнинг Белгиядаги элчисини лавозимдан олди. У вазир конференцияда нутқ сўзлаётган вақтда мудраб ўтирган.

Фото: Ministry of Foreign Affairs, European Union and Cooperation

Испания ташқи ишлар вазири Хосе Мануэл Албарес мамлакатнинг Белгиядаги элчиси Алберто Антонни Мадридда ўтказилган дипломатик конференция вақтида мудраб қолгани учун ишдан бўшатди.

Igeteo нашрининг ёзишича, Алберта Антоннинг кўзи илинган вақтда вазир чиқиш қилаётган бўлган. ТИВ раҳбарининг нутқи бир соат давом этган, дипломатнинг мудраб ўтиргани эса телекамерага тушиб қолган.

«Ухлаётган элчи тадбирни ёзиб олаётган оператор объективига тушиб қолди, шундан кейин эснаётган ва мудраб ўтирган Алберто Антоннинг қисқа роликлари ижтимоий тармоқларда тарқалди», — дейилади хабарда.

Нашрнинг қайд этишича, Испанияда Албаресни ишга бўлган қаттиқ талаби сабаб «кичик Наполеон» деб аташади. У иш фаолиятида турли хатоликларга йўл қўйган ёки Мадрид сиёсатига зид ишларни амалга оширган камида етти нафар амалдорни ишдан бўшатган.

Эслатиб ўтамиз, 2017 йилда АҚШ савдо вазири Уилбур Росс президент Доналд Трамп Ар-Риёдда бўлиб ўтган араб мамлакатлари етакчилари саммитида нутқ сўзлаётган вақтда ухлаб қолаёзганди.

Тайёрлаган: Фозилбек Юсупов

#элчи #Испания