ЦАҲАЛга Ғазо сектори аҳолиси чиқиб кетиши режасини тайёрлаш буюрилди

Исроил мудофаа вазири Исроил Кац Исроил мудофаа кучларига Ғазо аҳолисига Фаластин ҳудудини «ихтиёрий равишда тарк этиш» ва «уларни қабул қилишга тайёр бўлган исталган давлатга бориш» имконини берувчи режани ишлаб чиқишни топширди. «Режага чегарадан ўтиш жойлари орқали чиқиш вариантлари, шунингдек, денгиз ва ҳаво йўллари учун махсус механизмлар киритилади», — деб ёзди у 6 феврал, пайшанба куни X ижтимоий тармоғида.

Кац АҚШ президенти Доналд Трампнинг «жасур ташаббусини» маъқуллади, бу ғазоликлар учун «катта имкониятлар яратиши» мумкин бўлиб, улар қабул қилувчи мамлакатларга кўчиб ўтишига ва «Ҳамас кетганидан кейин хавф туғдирмайдиган қуролсизланган Ғазони қайта қуриш» режаларини амалга оширишга ёрдам беради, аммо «бунинг учун кўп йиллар керак бўлади».

Унинг сўзларига кўра, Ҳамас ғазоликлардан тирик қалқон сифатида фойдаланган ва «террор инфратузилмаси»ни қурган ҳамда ҳозир «уларни гаровда ушлаб, ёрдам тизими орқали пул ундириб, чиқиб кетишига тўсқинлик қилмоқда». «Ғазо аҳолиси бутун дунёда қабул қилинганидек, эркин ҳаракатланиш ва миграция ҳуқуқига эга бўлиши керак», — деди вазир.

Кац фаластинликлар кўчиб ўтиши мумкин деб ҳисоблаган давлатлар қаторида Исроилга Ғазо секторидаги хатти-ҳаракатлари юзасидан «ёлғон айбловлар қўйган» ва «қонун бўйича» минтақа аҳолисини қабул қилишга мажбур бўлган Испания, Ирландия, Норвегия ва бошқа давлатларни келтирди, агар улар рад этса, «уларнинг иккиюзламачилиги фош бўлади». Кац, шунингдек, «уюшган иммиграция дастурига» эга бўлган ва «илгари ғазоликларни қабул қилишга тайёрлигини билдирган» Канадани ҳам эслатиб ўтди.

Трамп: АҚШ Ғазо секторини назорат остига олади

АҚШ президенти Доналд Трамп АҚШ Ғазо секторини назорат остига олишини айтди. Республикачи бу ҳақда 4 феврал куни Оқ уйда Исроил бош вазири Бинямин Нетаняҳу билан учрашувдан сўнг гапирди. Матбуот анжумани Американинг Associated Press(AP) ахборот агентлиги томонидан трансляция қилинди.

«Қўшма Штатлар Ғазо секторини назорат қилади, биз у билан ишлаймиз, - деди Оқ уй раҳбари. - Биз унга эгалик қиламиз ва у ердаги барча хавфли портламаган бомбалар ва бошқа қуролларни демонтаж қилиш учун жавобгар бўламиз».

«Агар керак бўлса, буни қиламиз, бу участкани назоратга оламиз, ривожлантирамиз, минглаб иш ўринларини яратамиз. Бу бутун Яқин Шарқ фахрланиши мумкин бўлган нарса бўлади», деб қўшимча қилди Трамп. У ерда ким яшаши ҳақидаги саволга республикачи Ғазо сектори «дунё халқи» ва «Яқин Шарқ ривера»си учун уйга айланиши мумкинлигини айтди.

«Мен узоқ муддатли эгалик ҳолатини кўрмоқдаман ва мен буни Яқин Шарқнинг бу қисмига катта барқарорлик олиб келадиган нарса сифатида кўраман, - деб давом этди Трамп. - Мен буни кўп ойлардан бери диққат билан кўриб чиқдим». Ғазога АҚШ қўшинларини жўнатиш керакми деган саволга, Трамп: «Биз керакли нарсани қиламиз», деди.

«Мен Исроилни яхши кўраман. Мен у ерга бораман, Ғазога бораман, Саудия Арабистони ва бутун Яқин Шарқдаги бошқа жойларга бораман», — деб ваъда қилди Оқ уй раҳбари.

Нетаняҳу бу сўзларни ижобий қабул қилди. Исроил бош вазирининг сўзларига кўра, Трамп «янги ғоялар билан ўйлайди» ва «анъанавий фикрлашни йўқ қилишга тайёрлигини намойиш этади».