ҲАМАС гаровдаги яна уч нафар исроилликни озод қилди

Бунга жавобан Исроил 183 нафар фаластинлик маҳбусни қўйиб юборади.

Фото: BBC

Фаластиннинг ҲАМАС гуруҳи гаровга олинган уч нафар исроилликни Қизил Хоч ташкилоти ходимларига топширди. Озод қилинганлар: 53 ёшли Эли Шараби, 56 ёшли Оҳад Бен-Ами ва 34 ёшли Ор Леви.

Қизил Хочга топширилишидан олдин ҲАМАС гаровга олинганлар ташвиқот нутқларини ўқишга мажбурланган оммавий маросим ўтказди. Исроил бош вазири Бинямин Нетаняҳунинг идораси «бугун кўрилган даҳшатли тасвирларни жавобсиз қолдирмасликни» айтди.

Озод қилинган гаровдагилар эвазига Исроил бир кун ичида 183 нафар фаластинлик маҳбусни қўйиб юборади, улардан 18 нафари умрбод қамоқ жазосига ҳукм қилинган. Озод қилинган маҳкумларнинг 7 нафари озод этилганидан сўнг дарҳол депортация қилинади.

Бу 19 январдан кучга кирган сулҳ битимидан кейин бешинчи алмашинув бўлди.

Аввалги тўртта алмашинувда ҲАМАС гаровдаги 18 нафар исроилликни, жумладан, беш нафар Таиланд фуқаросини озод қилди. Исроил 400 маҳбусни, жумладан, умрбод қамоқ жазосига ҳукм қилинганларни ва узоқ муддат судсиз ушлаб турилганларни қўйиб юборди.

Тайёрлаган Сардор Юсупов

#Исроил #сулҳ #ҲАМАС

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.