АҚШ президенти Доналд Трамп 12 феврал куни Россия президенти Владимир Путин билан телефон орқали мулоқот қилди. Россия президенти матбуот котиби Дмитрий Песковнинг айтишича, суҳбат деярли бир ярим соат давом этган. Кремл маълумотларига кўра, суҳбат чоғида «Украинадаги вазиятни тартибга солиш мавзуси муҳокама қилинган» ва Трамп «жанговар ҳаракатларни тезроқ тўхтатиш ва муаммоларни тинч йўл билан ҳал қилишни ёқлаган».
«Владимир Путин, ўз навбатида, можаронинг асл сабабларини бартараф этиш зарурлигини айтиб ўтди ва Доналд Трамп билан узоқ муддатли келишувга тинч музокаралар йўли билан эришиш мумкинлигига рози бўлди. Россия президенти, шунингдек, Америка давлат раҳбарининг мамлакатларимиз биргаликда ишлаш вақти келгани ҳақидаги асосий тезисларидан бирини қўллаб-қувватлади», —дейилади Кремл хабарида.
Россия президенти маъмурияти хабарида айтилишича, Путин ва Трамп «шахсий алоқаларни давом эттиришга, жумладан, шахсий учрашувларни ташкил этишга келишиб олган», шу билан бирга, Россия президенти америкалик ҳамкасбини Москвага таклиф қилган. Аввалроқ «Медуза»нинг Россия президенти маъмуриятига яқин манбаси Трампни 9 май куни Москвага таклиф қилишмоқчи эканини айтганди.
Трамп Путин билан музокаралардан сўнг Украина бўйича музокараларни зудлик билан бошлашга келишиб олганини айтди. У ўзига тегишли Truth Social ижтимоий тармоғида Путин билан «узоқ ва жуда самарали мулоқот» ўтказгани ҳақида ёзди. АҚШ президентининг сўзларига кўра, улар «Украина, Яқин Шарқ, энергетика, сунъий интеллект, доллар кучи ва бошқа турли мавзулар»ни муҳокама қилишган.
«Биз мамлакатларимизнинг қудрати ва ҳамкорлик бир кун келиб бизга берадиган улкан фойда ҳақида гаплашдик. Лекин, биринчи навбатда, иккаламиз ҳам келишиб олганимиздек, биз Россия ва Украина ўртасидаги урушда оммавий қирғинни тўхтатмоқчимиз. Президент Путин ҳатто менинг сайловолди кампаниямдаги асосий шиоримни ишлатди: „Оқилона ёндашув“, биз иккаламиз ҳам бунга чин дилдан ишонамиз», — деб ёзди у.
АҚШ президенти Путин билан «биргаликда ишлаш, жумладан, мамлакатларимизга ўзаро ташриф буюриш»га келишиб олганини таъкидлади.
«Шунингдек, биз ўз жамоаларимизга музокараларни зудлик билан бошлашга кўрсатма беришга келишиб олдик. Биринчи қадам Украина президенти [Володимир] Зеленскийга қўнғироқ қилиб, уни бу суҳбат ҳақида хабардор қилиш бўлади — мен ҳозироқ бу билан шуғулланаман», — деган Трамп.
