Италияда мавсумнинг марказий ўйини, «Реал» ва «Атлетико» учун қийин синов. Ҳафта ўйинлари анонси

НАПОЛИ – ИНТЕР (1 март, 22:00)

Узоқ йиллик танаффусдан сўнг «Интер»ни мамлакат чемпионига айлантирган Антонио Конте энди «Наполи» бошида туриб собиқ жамоасига қарши чемпионлик баҳсини ўтказади. Ромелу Лукаку ҳам собиқ жамоасига қарши. Умуман олганда, бу ўйинда мана шундай қўшимча интригалар олиб келиш ҳам шарт эмас, зеро бизни том маънода чемпионлик баҳси кутиб турибди. «Интер» 57 очко билан жадвални бошқариб келаётган бўлса, «Наполи»да бир очко кам, яъни ғалаба қозониб якка пешқадамга айланиши мумкин. Дуранг ҳам ҳар икки жамоани қониқтирмайди, чунки у ҳолда айни пайтда 54 очкога эга бўлган «Аталанта» ҳам максимал даражада яқинлашиб келиши мумкин. «Аталанта» икки ҳафта ўтиб «Интер»ни қабул қилишини ҳам унутмаслик лозим.

Булардан ташқари, чемпионлик курашда миланликлар учун яна бир ноқулайлик борки, айни дамда позицияни бой бериш зинҳор керак эмас. Сабаби, «Интер» Чемпионлар Лигасида курашни давом эттирмоқда, бу ўйиндан уч кун ўтиб ҳам «Фейенорд» билан муҳим учрашув кутиб турибди. «Наполи» ва «Аталанта» эса еврокубокларда эмас, бор имкониятини А Серия чемпионлигига қаратиш имкониятига эга. Бунинг устига Италия кубогида ҳам яримфиналда айнан «Интер» бўлиб, рақобатчилари бу турнирдан ҳам чиқиб кетишган. Яъни шу шартларда ҳам «Интер» соврин учун курашда сўнгги турларгача бора олса, жуда катта матонат кўрсатган бўлади.

Жароҳатларга тўхталадиган бўлсак, меҳмонлар дарвозасини Ян Зоммер қўриқлай олмайди, жароҳат олган. Аммо сўнгги икки ўйинда Хосеп Мартинес ўзини жуда яхши кўрсатаётганини ҳам таъкидлаш керак. «Женоа» ва «Лацио»га қарши ўйинларда миланликлар дарвозасини қўриқлаган испаниялик дарвозабон ҳали бирорта ҳам гол ўтказиб юбормади, «Лацио» билан ўйинда эса энг яхши деб топилди. Шунингдек, Дармиан, Зелевски ва Аугусто меҳмонлар сафида ўйнай олмаса, «Наполи» мураббийи Андре Замбо-Ангиссанинг ёрдамидан фойдалана олмайди. Давид Нересда ҳам жароҳат бор.

Ўзаро ўйинларга тўхталадиган бўлсак, тенгликни кўрамиз – охирги 36 ўйинда ҳар икки томонда 12 тадан ғалаба ва шунча ўйин дуранг билан якунланган. Энг охирги икки ўйин ҳам бир хил 1:1 ҳисобида билан якунланганини ҳам таъкидлаш лозим. А Сериядаги статистик кўрсаткичларга эътибор берсак, ҳар икки жамоа асосан ҳимоядаги ўйини бўйича ҳам етакчилик қилаётганини кўрамиз – энг кам ўтказиб юбориш бўйича ҳам, қуруқ ўйинлар борасида ҳам бу жамоалар кучли учликда бормоқда. Аммо бу факт ушбу ўйиннинг зерикарли ва ҳимоявий ўтишидан далолат қилмаслигини ҳам айтган бўлардик. Масалан, «Интер»нинг ҳимоявий кўрсаткичлари юқори бўлган бошқа бир жамоа «Ювентус»га қарши ўйинида голлар кам урилган бўлса-да, жуда ҳужумкор ва қизиқарли ўйин гувоҳи бўлгандик.

БЕТИС – РЕАЛ МАДРИД (1 март, 22:30)

Кучли бешликда чемпионлик интригаси айнан Италия ва Испанияда авжига чиқаётганини кўриб турибмиз. Англия, Франция ва Германияда пешқадам етарлича фарқ билан олдинлаб, бу масалага амалда нуқта қўйишган бўлса, бу икки чемпионатда соврин учун иккидан ортиқ жамоа курашаётгани ҳам эътиборга лойиқ. Испанияда чемпионлик учун курашаётган учала жамоа ҳам Чемпионлар Лигасида ҳам курашни давом эттираётгани эса рақобатнинг янада юқорироқ савияда кечаётганини кўрсатиб турибди. Испанияда аввал ҳам кураш бўлган, совриндорлар алмашиб ғолиб бўлганини ҳам кўриб келяпмиз, аммо кўпинча жамоалардан бирида муаммолар бўлар, иккинчиси фойдаланиб қоларди. Аммо бу мавсум бошқача кечмоқда. Бемалол айтиш мумкинки, ҳам «Реал» ҳамда «Барселона» айни пайтда анча юқори формада ва нафақа Испания, балки Европанинг энг кучли жамоаси бўлиш учун асосий фаворит бўлиб туришибди.

«Бетис»га қарши ўйин «Реал» учун навбатдаги оғир синов бўлиши шубҳасиз. Жамоа турнир жадвалида қайси ўринни эгаллаб турганидан қатъи назар, Андалусияда ҳеч кимга осон бўлмаслигини яхши биламиз. Айнан «Реал» ташриф буюрган охирги 6 ўйинни олсак ҳам уч марта дуранг қайд этилган бўлса, уч марта «Реал»нинг минимал ғалабаси билан тугаган. Бу орада «Бетис» ҳам Мадридда бўш келмаганини кўришимиз мумкин – охирги 7 ўйиннинг 4 тасида мағлубиятга учрамасликни уддалашган. Икки марта уч очко билан қайтишган. Бетисдаги охирги ўйин эса ўтган мавсумда 1:1 дуранг билан якунланганди.

«Реал»га қарши муваффақиятли натижалардан ташқари, «Бетис» ўзи сўнгги ўйинларда яхши формага кириб олганини ҳам таъкидлаш керак. Ла Лигадаги охирги 4 ўйиндан учтасини ғалаба билан якунлади, Конференциялар кубогида кейинги босқичга чиқди. Бу натижалар «Сосьедад», «Атлетик» каби кучли баск жамоаларига қарши қўлга киритилганини ҳам таъкидлаш лозим.

Бу юксалишни қайсидир маънода таркибга Антонининг келиб қўшилиши билан ҳам боғлашмоқда. Бразилиялик вингер Англиядаги муваффақиятсиз йилларидан сўнг гўёки эркинликка чиққандек, «Аякс»даги даврларини эсга солиб юборяпти. Қисқа муддатда у аллақачон 3 гол ва 2 ассистни амалга ошириб улгурди. Ҳа, қизил карточка ҳам олди, айтганча. Қизиғи, айнан шу карточка туфайли у «Реал»га қарши ўйинни ўтказиб юбориши керак эди. Аммо ушбу карточка юзасидан шикоят киритилгач, Лига «Бетис»нинг талабини қондириб, дисквалификацияни бекор қилди. Худди шундай ҳолат «Реал»да ҳам бор – Жуд Беллинҳэм қизил карточка туфайли Испания чемпионатидаги навбатдаги ўйинлардан четлатилган. Аммо мадридликларнинг шикояти ўринсиз деб топилди ва у «Бетис»га қарши ўйинда майдонга туша олмайди.

«Реал»да Беллинҳэмдан ташқари яна иккита жиддий йўқотиш бор. Федерико Валверде ва айниқса, сўнгги пайтларда анча юқори даражадаги ўйин кўрсатиб, марказда катта хажмдаги меҳнатни амалга ошириб келган Себальос. У нафақат ушбу ўйин балки кейинги ҳафталарда ҳам жамоасига ёрдам бера олмайди. «Реал»ни эса келаси ҳафтадаёқ «Атлетико»га қарши Чемпионлар Лигаси нимчорак финали кутиб турибди. «Бетис»нинг ҳам Конференция кубогида ўйини бор, аммо рақиб – Португалиянинг «Гимараеш» клуби. Яъни испанлар бемалол бу босқичдан ўтишлари мумкин.

Дарвоқе, «Бетис»да ҳам ушбу ўйин учун йўқотишлар бор. Айниқса, Жованни ле Челсо, ҳамда «Сосьедад» дарвозасига дубл қайд этган Марк Роканинг йўқлиги сезилса керак. Яна бир факт, «Реал» турнир жадвалида пешқадамлар сафида борса-да, айнан сафар ўйинларида доим ҳам ишончли кўринмаётганини таъкидлаб ўтиш керак. Анчелотти жамоаси сафардаги 13 ўйиннинг ярмидан кўпида ғалаба қозонишнинг уддасидан чиқмаган. Бу ҳам «Бетис» учун қўшимча имконият борлигини англатади.

АТЛЕТИКО – АТЛЕТИК (2 мартга ўтар кечаси, 01:00)

Доим Испанияда уч жамоа чемпионлик учун курашаётганини, «Атлетико» эса «Реал» – «Барселона» фонида бироз сояда бўлиб, якунда улоқни илиб кетиши мумкинлиги ҳақида гаплар кўп. Сабаби, натижалар бўйича мадридликлар энг барқарорлардан бири, таркиб кенглиги, захирадагиларнинг натижаларга таъсири бўйича ҳам рақибларидан устун, бу эса ҳал қилувчи паллада анча ёрдам беради. Кейин тахминларга кўра Чемпионлар Лигасида «Атлетико» катта эҳтимол билан «Реал»га бой бериши мумкин, бу эса Симеоне жамоасига бор кучини Испания чемпионатига ташлаш имконини беради. Шунақа гаплар.

Лекин энг қизиғи, чемпионлик пойгасидаги мана шу уч жамоа фонида ҳам сояда кетаётган яна бир клуб бор – «Атлетик». Тасаввур қилинг, билбаоликлар мавсумни бир текисда ва жуда зўр ўтказаётгандек кўринаётган уч жамоадан атиги 6 очкога ортда боряпти холос. Жамоа мавсум давомида атиги уч марта мағлубиятга учраган, охирги 17 ўйинда эса умуман ютқазгани йўқ. Бу натижалар бир неча фронтда курашиб туриб ҳам қўлга киритилаётгани Валвердени мақташ учун катта асос. «Атлетик» ҳам Испания Суперкубогида қатнашиб келди, ҳам Европа Лигасида дастлабки босқичида энг яхши жамоалардан бўлиб, «МЮ», «Тоттенҳэм», «Айнтрахт» каби бир қатор кучли жамоаларни ортда қолдириб, умумий жадвалда 2-ўринни эгаллади. Келаси ҳафтада эса билбаоликларни «Рома»га қарши плей-офф ўйини кутиб турибди.

Юқорида айтилганидек, «Атлетик» атиги уч марта мағлубиятда учраган. Икки марта Каталонияда, «Барселона» ва «Жирона» билан ўйинларда. Шунингдек, ўз майдонида айнан «Атлетико»га қарши ўйинда басклар имкониятни бой беришган. Ўйин аслида анча тенг курашлар остида кечгани, учрашув тақдирини ҳал қилган ягона гол эса қўшиб берилган дақиқаларда урилганини ҳам эсласангиз керак. Умуман олганда, «Атлетик» ўз майдонида ўйинларда мадридликларни кўп хафа қилиб туради. Айнан Мадридда ўтган учрашувларни оладиган бўлсак, ҳа, бу ерда билбаоликларнинг натижалари зўр эмас – охирги ғалаба 2011 йилда қўлга киритилган. Аммо бир йил олдин «Атлетик» Қироллик кубогида рақибига қарши муваффақиятли ўйин кўрсатган, ўз майдонида 3:0, Мадридда эса 1:0 ҳисобида устун келганди.

Жароҳатларга келсак, мезбонлар сафида деярли йўқотишлар мавжуд эмас. Симеоне шогирдларининг мавсумда турли жароҳатларни четлаб ўтаётганининг сабаби ҳам кўп келтирилган – мураббий даражаси бир-бирига яқин бўлган кўп футболчиларга эга ва у ротациядан унумли фойдаланмоқда. Ўйинчи алмаштиришлар ҳам анча эрта амалга оширилиши туфайли босим ва юкламалар ҳам кўп футболчиларга тенг тақсимланмоқда. Балки мана шу ҳам «Атлетико»нинг ҳалигача рақобатбардош бўлиб ўзи қатнашаётган барча турнирларда ғолиблик учун курашаётганининг асосий омили бўлиши мумкин. Айнан ушбу ўйинда фақат Кокеда кичик жароҳат бор ва у шерикларига ёрдам бера олмайди. Меҳмонлар сафида эса Ойан Сансетнинг ўйинда қатнаша олмаслик эҳтимоли жиддий йўқотиш ҳисобланади. Зеро 24 ёшли ҳужумчи охирги ўйинларда анча формага кирган, сўнгги 4 учрашувда 6 бор рақиблар дарвозасини ишғол қилганди.

НЮКАСЛ – БРАЙТОН (2 март, 18:45)

Англияда бу ҳафта тур ўйинлари ўтказилмайди, Англия кубоги нимчорак финал учрашувлари бўлиб ўтади. Афсуски, бир қатор топ-жамоалар турнирни эртароқ тарк этишди, курашда классик топ-6 дан фақат сўнгги икки мавсум финалчилари «МЮ» ва «Манчестер Сити» қолди холос. Аммо таъкидлаш керакки, айни пайтда Англияда жуда кўп қизиқарли ва айнан кубокбоп жамоалар бор. Бу шундай жамоаларки, анча йилдан бери у ерда жуда яхши, тўғри ишлар амалга оширилаётганини кўрасиз, уларнинг кучли рақибларга қарши жуда кучли перформансини, ўз услубидан воз кечмай, қаттиқ қаршилик кўрсатишининг гувоҳи бўласиз. Аммо кўпинча бу жамоалар баъзида етакчи футболчиларини сотишга мажбур бўлади, ҳаммаси бошқатдан бошланишига олиб келади. Мана шу орада, яъни жамоалар энг юқори нуқтага чиққанда, ҳеч бўлмаса бирор соврин ютиб, тарихга муҳрланишини истаб турасиз.

«Брайтон», «Борнтмут», «Ноттингем», «Астон Вилла» ва албатта, анча молиявий бақувват бўлса-да, «Нюкасл» шулар жумласидандир ва буларнинг ҳаммаси жорий мавсумдаги Англия кубогида ўз иштирокини давом эттиришмоқда. Демак бемалол топ-клубларга осон бўлмаслигини ва биз қаторасига учинчи йил финалда Манчестер дербисини кўрмаслигимизни билиб тургандеймиз. Мана шу саналган жамоаларнинг ҳар қайсиси финалга муносиб ва «Уэмбли»да улардан бири ёки ҳатто иккитасини ҳам кўришимиз эҳтимоли кичик эмас.

Табиийки, бундай икки жамоанинг ўзаро тўқнашуви ўта қизиқарли кечади. Ҳар икки жамоа юқори ўринлар, хусусан Чемпионлар Лигаси йўлланмаси учун курашаётган бўлса-да, мана шундай кубоклар мухлислар учун нималарни бера олишини ҳис қила олишади. «Нюкасл» икки йил олдин Лига кубоги финалида тўп сурганди, икки ҳафта ўтиб навбатдаги мана шундай финалда «Ливерпул»га тўқнаш келади. Эдди Хау лойиҳаси ниҳоят совринлар ютиш палласига кириши лозим. «Брайтон» ҳам «Уэмбли»да тўп сурганига узоқ вақт бўлмади – икки йил олдин жамоа мана шу турнир яримфиналида «МЮ»га қарши тўп сурган ва фақат пеналтилар сериясида имкониятни бой бериб қўйганди.

Яна бир жиҳат, бу рақибларнинг ўзаро ўйинларида олдиндан натижани ёки фаворитни тахмин қилиш деярли имконсиз экани. Нафақат ўйин ғолиби, балким қайси жамоа устунлик кўрсатади, ўйин кимнинг ташаббуси остида кечишини ҳам билиб бўлмайди. Рақибларнинг айнан Нюкаслда бўлиб ўтган охирги 9 ўйинини олсак ҳам меҳмонлар уч марта, мезбонлар ҳам уч марта ғалаба қозонишган. Бу натижалар ичида мезбонларнинг 4:1 ҳисобидаги йирик ғалабаси ҳам, аксинча, «Брайтон»нинг жавобсиз уч гол ургани ҳам бор – демак бу ўйиндан ҳам ҳар нарсани кутиш мумкин.

Жароҳатланганларга келсак, табиийки, Жоалинтоннинг йўқлиги «Нюкасл»га ҳар ўйинда билинмоқда. Жамоа АПЛ доирасидаги охирги 4 ўйиннинг учтасида мағлуб бўлди ва табиийки, майдон марказида бразилиялик яримҳимоячининг йўқлиги ўз таъсирини ўтказмай қолмади. Меҳмонларда эса йўқотишлар жуда кўп ва жамоа мана шу режимда тўп суришга ўрганиб ҳам қолган. Данк, Велтман, Игор, Стил каби футболчилар ҳали тикланишгани йўқ. Кадиўғли ва Милнернинг эса бу жамоага тегишли экани кўпчиликнинг ёдидан чиқиб кетди ҳам.

БОШҚА ЎЙИНЛАР

1 март. АТАЛАНТА – Венеция (19:00), Санкт Паули – БОРУССИЯ Д (19:30), Айнтрахт – БАЙЕР (22:30), МАНЧЕСТЕР СИТИ - Плимут (22:45), ПСЖ – Лилл (2 мартга ўтар кечаси, 01:05)

2 март. БАРСЕЛОНА – Сосьедад (20:15), МЮ – Фулҳэм (21:30), РОМА – Комо (22:00), МИЛАН – Лацио (3 мартга ўтар кечаси, 00:45).