6 март куни Ўзбекистон футбол ассоциациясида Ўзбекистон U-20 бош мураббийи Фарҳод Нишонов ва унинг мураббийлар штаби иштирокида матбуот анжумани ўтказилди.
Тадбир Ўзбекистон ёшлар жамоасининг Хитойда ўтган Осиё кубогидаги иштирокига бағишланди. Фарҳод Нишонов шогирдлари чоракфиналда Жанубий Кореяга (3:3, пен, 1:3) енгилиб, жаҳон чемпионати йўлланмасидан қуруқ қолганди.
«Айрим инсонлар, қўштирноқ ичидаги журналистлар ҳар хил гаплар билан бизнинг ишимизни бўртирриб, шубҳали гаплар қилиб, туҳмат қилишмоқда. Биз шу вақтга ҳеч қандай шубҳали иш қилмаганмиз. Мақсадимиз нима эканлигини аниқ билардик. Ватан учун хизмат қилганмиз.
Натижага мураббий жавоб беради. Бу нормал ҳолат. Тушкунликка тушмаймиз. Ўйинларни кўрдингиз, озгина омад етишмади. Пеналтилар сериясида манаман деган футболчилар ҳам гол ура олишмаган. Бу босим ёки руҳий ҳолат эмас, шунчаки омад билан боғлиқ деб ўйлайман" - деди у.
- Осиё чемпионати олдидан жамоамиз керагидан ортиқ йиғин ўтказдими?
- Биз Корея ёки Японияга тушишимиз эҳтимолини қуръадан сўнг билдик. Улар ҳам бизга ўхшаб 20 тача ўйин ўтказган. Норасмийлари ҳам бор.
Клублар 15 январдан йиғинга киришяпти. Ички чемпионат ноябрда тугаяпти, Осиё чемпионати февралда бошланади. Сиз йигитларни 20 январда қитъа чемпионатига олиб кетармидингиз? Мусобақага тайёргарлик, тикланиш бор, шунинг учун йиғинни эртароқ бошладик.
Агар пеналтилар сериясида ютганимизда, ҳозир бизга бошқача савол бераётган бўлар эдингиз.
Аввалги анжуманда Саудия Арабистони билан ўйинда футболчиларнинг жисмоний ҳолати қизил ҳудудга тушиб қолдими, деб савол беришганди. Бу ўйинчиларнинг ҳолати ёмон дегани эмас. Қолаверса, ичкаридан бу маълумотларни ташқарига олиб чиққан футболчилар жамоадан четлатилган. Жисмоний ҳолатдан муаммо бўлмаган.
Муаммо ўйинчиларнинг жароҳатлари бўлди. Бу бизни кўп қийнади. Ўринбоевда, Ҳайдаровда, Хайруллаевда, Ризақуловда, Файзуллаевда, Ибрагимовда, Муратбоевда айнан, ўйинлардан олдин жароҳат олишганди. Кимлардир клубларидаги эски жароҳатлар билан келганди.
- Ўринбоев муҳим ўйинлар сабаб операция қилинмадими?
