The Verge маълумотларига кўра, Microsoft компанияси Windows 12 операцион тизимини чиқариш фикридан қайтиб, бор эътиборини Windows 11 тизимини яхшилашга қаратади. Компания 2027 йил кузида тақдим этиладиган 27H2 рақамли йирик янгиланиш устида аллақачон иш олиб бормоқда.
Кичик янгиланишлар тўпламидан иборат бўлган 25H2 ва 26H2 янгиланишдан фарқли равишда, 27H2 талқини ушбу ОТ учун 2024 йилдан бери энг йирик янгиланишга айланади. Манбаларга кўра, тизимнинг асосий таркибий қисмлари алмаштирилади ёки тубдан янгиланади.
Энг кўзга ташланадиган ўзгаришлардан бири Windows 11 янги фони бўлади. Microsoft шу ой охирида ўтказиладиган Ignite конференциясида дизайннинг бир нечта вариантини намойиш этади, янгиланган фон расмлари эса январь ойидан бошлаб оммавий тарқатилади. Уларнинг кўриниши жорий Bloom экран лавҳасини эслатади, бироқ оддий фойдаланувчилар ва бизнес версиялари учун бошқача ранглар уйғунлиги қўлланади.
Бундан ташқари, Windows Intel APX технологиясини тўлақонли қўллаб-қувватлай бошлайди ҳамда тезкор хотираси (RAM) кам бўлган компьютерларнинг унумдорлигини оширишга қаратилган муҳим яхшиланишларга эга бўлади. The Verge таъкидлашича, Microsoft шунчаки жарангдор номли янги тизим чиқаришдан кўра, Windows 11 ишончлилигини ва фойдаланувчи тажрибасини босқичма-босқич ошириш орқали одамларнинг ишончини қайтаришга умид қилмоқда.
Илгари Microsoft янги Windows тизимларини ҳар уч йилда чиқарар эди. Бироқ Windows 11 пайдо бўлиши билан компания бизнес моделини ўзгартирди ва уч йиллик ишлаб чиқиш цикли ўрнига тизимни мунтазам янгиланишлар орқали ривожлантириб боришни назарда тутувчи «Windows хизмат сифатида» концепциясига устуворлик берди.
Microsoft фойдаланувчилар анча вақтдан бери сўраб келаётган функцияларни қўшган ҳолда Windows 11 операцион тизимини такомиллаштиришда давом этмоқда. Яқинда Windows 11 янгиланишларини муддатсиз тўхтатиб туриш имконияти пайдо бўлди. Шунингдек, қувват менюсига янгиланишларни ўрнатмасдан компьютерни ўчириш ёки қайта юклаш учун алоҳида тугма қўшилди.
