Миллий гвардиянинг вояга етмаганлар масалалари бўйича инспектор-психологлар лавозимлари ИИВга ўтказилди

Видеоселектор тарзида ўтказилган мазкур йиғилишда Бош прокуратура, Ички ишлар вазирлиги, соҳага масъул вазирлик ва идоралар раҳбарлари ва масъул ходимлари, вилоят, туман (шаҳар) ҳокимлари, прокурорлари ва ички ишлар бўлинмалари бошлиқлари ва бошқа мутасадди идоралар вакиллари иштирок этишди.

Йиғилишда қарорлар мазмун ва моҳияти тўлиқ ёритилиб, криминоген вазиятни кундалик таҳлил қилиш ва манзилли назорат тадбирларини амалга ошириш орқали маҳаллаларда ҳуқуқбузарликларнинг барвақт олдини олишни таъминлаш, бу борада "маҳаллабай" манзилли чоралар натижадорлигини оширишнинг янгича механизмлари кўрсатиб ўтилди.

Танқидий руҳда ўтказилган йиғилишда жиноятчилик ва ҳуқуқбузарликларнинг олдини олишда йўл қўйилган хато ва камчиликлар аниқ рақамлар ҳамда мисолларда кўрсатиб ўтилиб, галдаги вазифалар белгилаб олинди.

Жумладан, жиноятлар оғирлик даражаси ва тоифасига асосан “республика–вилоят–туман” даражаси тамойили асосида сўров, мувофиқлаштириш ва қатъий назорат тизими йўлга қўйилиши таъкидланиб, масъулларга бу борада аниқ топшириқлар берилди.

Бундан ташқари, Миллий гвардиянинг вояга етмаганлар масалалари бўйича инспектор-психологлар лавозимлари ва 2 000 та штат бирлигини Ички ишлар вазирлиги тузилмасига ўтказилганлиги маълум қилиниб, ички ишлар органлари томонидан вояга етмаганлар билан “Оила – маҳалла – мактаб” тамойили асосида манзилли ишлаш йўналишида аниқ вазифалар белгилаб берилди.

Тадбир давомида ҳудудлар ҳамда республика идора ва вазирликларнинг раҳбарлари, масъул ходимлари тушунтириш ва ахборотлари эшитилди.