ДХХ хабарига кўра, тезкор тадбир хизматнинг Тошкент шаҳар бўйича бошқармаси, Бош прокуратура ҳузуридаги Департамент ҳамда Ички ишлар вазирлиги ходимлари ҳамкорлигида ўтказилган.
Маълум қилинишича, Жиззах вилоятининг Ғаллаорол туманида 1997 йилда туғилган, ҳозирда Тошкент шаҳрида яшовчи шахс фуқаронинг ишончига кириб, уни танишлари орқали пойтахтдаги хусусий олийгоҳнинг 3-босқичига ўқишга киритишни ваъда қилган. Бунинг учун фуқаро гўёки Россиядаги олий таълим муассасаларидан бирида икки йил ўқиганини тасдиқловчи сохта ҳужжатлардан фойдаланиш режалаштирилган.
Ушбу шахс хизмати эвазига 8 минг доллар талаб қилиб, 7 500 долларни олган вақтида ашёвий далиллар билан ушланган.
Тезкор тадбир давомида Самарқанд вилоятининг Иштихон туманида рўйхатда турувчи, Тошкент шаҳрида вақтинча яшовчи, 1993 йилда туғилган фуқаро ҳам биринчи шахсдан мазкур 7 500 долларни олаётганида ушланган.
Терговга қадар текширувда ушбу ҳолатга Яккасарой тумани ИИО ФМБнинг инспектор-психологи ҳам алоқадорлиги аниқланган. Давом эттирилган тезкор тадбирда инспектор ҳам 7 500 долларни олган вақтида ушланган.
Ҳозирда мазкур шахсларга нисбатан жиноят иши қўзғатилган, тергов ҳаракатлари олиб борилмоқда.
