Ҳитроу аэропорти катта ёнғин туфайли ёпилди 

Лондондаги Ҳитроу аэропорти Лондон ғарбидаги Хейс яқинида жойлашган электр нимстанциясида содир бўлган кучли ёнғин туфайли ёпилди. Бу ҳақда 21 март, жума куни Sky News хабар берди. 

Аэропорт вакилининг аниқлик киритишича, аэропортнинг катта ҳудудида «электр таъминоти узилган». Таъминотни қачон узилишларсиз тиклаш мумкинлиги ҳозирча аниқ эмас.

Аэропорт 21 март куни маҳаллий вақт билан соат 23:59 (Тошкент вақти билан 22 март 04:00)гача ёпиқ бўлади.

Парвозларни кузатиш бўйича Flightradar24 сайти Ҳитроуга йўл олган камида 120 та самолёт бошқа жойга йўналтирилиши ҳақида хабар қилди.

Парвозлар одатда тунги танаффусдан кейин соат 05:00 (Тошкент вақти билан 09:00)лар атрофида амалга оширилади.

Ҳитроу дунёдаги энг гавжум аэропортлардан бири бўлиб, ўтган йили рекорд даражадаги 83,9 миллион йўловчига хизмат кўрсатган. Самолёт ҳар 45 сонияда у ерга қўнади ёки парвозга кўтарилади.

Йўловчиларга Ҳитроуга бормаслик ва авиакомпанияларга мурожаат этиш тавсия қилинди, дея хабар беради dpa.

Подстанциядаги ёнғин: аланга устуни ва қуюқ қора тутун 

Ёнғин аэропортдан 2,5 км узоқликда жойлашган подстанцияда содир бўлган ва 16 мингга яқин уй электр таъминотисиз қолиши мумкин.

Фавқулодда ҳодиса жойидан олинган суратларда аланга устуни ва қуюқ қора тутун кўтарилаётгани акс этган.

Лондон ўт ўчириш бригадасининг маълум қилишича, воқеа жойида 10 та ўт ўчириш машинаси ва 70 га яқин ўт ўчирувчи бор.

Ўт ўчирувчилар маълумотларига кўра, подстанциядаги трансформатор ёниб кетган, бунинг сабаблари ўрганилмоқда.

150 га яқин одам эвакуация қилинган, 200 метрлик тўсиқ ўрнатилган.

Лондон ўт ўчириш бригадаси воқеа юзасидан 190 дан ортиқ қўнғироқларни қабул қилганини маълум қилди. Аҳоли тутун туфайли дераза ва эшикларни ёпиқ ҳолда сақлашга чақирилди.