Сицилиядаги Катания аэропорти Этна вулқонининг давом этаётган отилиши туфайли камида 14 август маҳаллий вақт билан соат 02:00 гача ёпиқ қолади. DPA агентлиги хабарига кўра, аэропорт фаолиятининг тўхтатилиши яна узайтирилиши ҳам мумкин.
Европадаги энг фаол вулқон ҳисобланган Этнанинг навбатдаги фаоллашуви бир неча кундан бери Сицилиядаги авиақатновларга жиддий таъсир кўрсатмоқда. Юзлаб рейслар жадвалига ўзгартиш киритилган.
Айрим авиарейслар бутунлай бекор қилинган ёки кечиктирилган. Катанияга қўниши керак бўлган самолётларнинг бир қисми Сицилия пойтахти Палермодаги аэропортга, бошқалари эса Комизодаги кичик аэропортга йўналтирилган.
Бу ҳолат оролдаги транспорт тизимига ҳам қўшимча босим келтириб чиқарган. Йўловчилар муқобил аэропортларга етиб олишга уринаётгани сабаб поездларда одамлар сони кескин кўпайган. Шунингдек, айрим йўловчилар такси нархлари кескин ошгани ҳақида хабар берган.
Этна вулқонининг отилиши оқибатлари қўшни Малта оролидаги авиақатновларда ҳам сезилмоқда. Times of Malta нашри маълумотига кўра, 11 август куни Малтада 19 та авиарейс бекор қилинган. 12 августда эса яна учта рейс амалга оширилмаган, бир қатор бошқа парвозлар кечиктирилган.
Этнадан янги лава оқимлари чиқмоқда
Этна вулқони жума кунидан буён катта миқдорда вулқон кули ва қизиб турган тоғ жинсларини ҳавога отмоқда.
Италия Миллий геофизика ва вулқоншунослик институти (INGV) маълумотига кўра, кучли лава оқимлари денгиз сатҳидан 2360 ва 2750 метр баландликда жойлашган иккита оғиздан оқиб чиқмоқда. Кейинчалик яна иккита янги лава оқими пайдо бўлган.
Вулқон кули авиация учун алоҳида хавф туғдиради. У ҳавога кўтарилганда самолётлар ҳаракати чекланиши, рейслар бекор қилиниши ёки бошқа аэропортларга йўналтирилиши мумкин. Шу сабаб Катания аэропортидаги вазият вулқон фаоллиги ва кул тарқалишига қараб баҳоланмоқда.
Этна Европадаги энг фаол вулқон бўлиб, у бир йил давомида бир неча марта фаоллашиши мумкин. Унинг аввалги фаоллик даври июль ойи бошида кузатилган ва ўшанда ҳам Сицилияда бир қатор авиарейслар бекор қилинган эди.
