АҚШ пойтахти Вашингтонда Доналд Трамп ташаббуси билан қурилиши режалаштирилган улкан тантанавор арка атрофидаги баҳслар судгача етиб борди. Лойиҳа қурилиш учун якуний режалаштириш рухсатини олганига қарамай, федерал судя қурилиш ишларини 14 кунга вақтинча тўхтатиш ҳақида қарор чиқарди.

Kun.uz’нинг АҚШдаги мухбири арка қурилиши режаланган ҳудуддан репортаж тайёрлади.

Хўш, Трамп нима учун бундай арка қурмоқчи? Унинг қурилишига кимлар қарши ва суд қандай асосларни келтирди?

Гап баландлиги тахминан 76 метр, яъни 250 фут бўлган улкан иншоот ҳақида кетмоқда. Арка Вашингтондаги Линколн мемориали ва Арлингтон миллий қабристони оралиғидаги Memorial Circle ҳудудида қурилиши режалаштирилган.

Оқ уй тақдим этган лойиҳа тасвирларида иншоот оқ рангда, олтин тусдаги безаклар ва тепасида учта йирик ҳайкал билан тасвирланган. Маъмурият уни АҚШ тарихининг 250 йиллигини нишонлаш ва мамлакат ҳарбий хизматчилари хотирасини улуғлаш рамзи сифатида тақдим этмоқда.

Бироқ лойиҳа атрофида жиддий эътирозлар ҳам бор.

Аркнинг қурилишига қарши чиққанлар орасида Ветнам уруши фахрийлари, Вашингтон шаҳри ва Виржиния штати вакиллари бор. Уларнинг фикрича, бундай йирик иншоотни қуриш учун Конгресснинг тегишли рухсати талаб этилади. Шунингдек, қурилиш транспорт ҳаракатига, ҳудуд экологиясига ва Арлингтон қабристонининг тарихий муҳитига салбий таъсир кўрсатиши мумкин.

Низонинг асосий нуқтаси эса ҳуқуқий масала: АҚШ маъмурияти 1925 йилда қабул қилинган қонунни ушбу лойиҳага асос қилиб кўрсатмоқда. Даъвогарлар эса бу қонун янги монументал иншоот қуришга етарли ваколат бермаслигини таъкидламоқда.

5 ноябр куни Миллий пойтахт режалаштириш комиссияси лойиҳани 8 овозга қарши 4 овоз билан маъқуллади. Бу қурилиш учун муҳим босқич эди.

Аммо шу куннинг ўзида федерал судя Таня Чуткан қурилиш билан боғлиқ барча ишларни 14 кунга тўхтатиш ҳақида вақтинчалик тақиқ чиқарди. Қарор қазиш, бузиш, ерга ишлов бериш, коммуникациялар ўрнатиш ва йўлларни ёпиш каби ишларни ҳам қамраб олади.

Судянинг дастлабки хулосасига кўра, даъвогарларнинг ҳукумат зарур қонуний тартибларни бажармаган бўлиши мумкинлиги ҳақидаги эътирозлари жиддий асосга эга. Суд, шунингдек, қурилиш бошланса, транспорт ва бошқа инфратузилма билан боғлиқ зарар юзага келиши мумкинлигини қайд этди.

Оқ уй эса комиссия томонидан берилган рухсатни олқишлади ва суд жараёни давомида лойиҳа қонунийлиги исботланишига ишонч билдирди.